സ്വകാര്യ കമ്പനികളിൽ നിന്നുള്ള വൈദ്യുതി വാങ്ങൽ നഷ്ടമെന്ന് കെ.എസ്.ഇ.ബി; തീരുമാനത്തെ ന്യായീകരിച്ച് മുഖ്യമന്ത്രി വി.ഡി. സതീശൻ

തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധി പരിഹരിക്കാൻ സ്വകാര്യ കമ്പനികളിൽ നിന്ന് വൈദ്യുതി വാങ്ങുന്നത് നഷ്ടമുണ്ടാക്കുമെന്ന് കെ.എസ്.ഇ.ബി. സ്വകാര്യ കമ്പനികളെ ആശ്രയിച്ചാലും വൈദ്യുതി ക്ഷാമം പരിഹരിക്കപ്പെട്ടേക്കില്ലെന്നും, ഹിമാചൽ പ്രദേശിൽ നിന്നുള്ള വൈദ്യുതിയാണ് കൂടുതൽ ഫലപ്രദമെന്നും ബോർഡ് വ്യക്തമാക്കുന്നു.

ഹിമാചലിൽ നിന്നുള്ള വൈദ്യുതി രാത്രി സമയങ്ങളിലും സുഗമമായി ഉപയോഗിക്കാൻ സാധിക്കും. സ്വകാര്യ കമ്പനിയായ ജി.എൻ.എ (GNA) വഴി വെറും 500 മെഗാവാട്ട് വൈദ്യുതി മാത്രം ലഭിക്കുമ്പോൾ, ഹിമാചലിൽ നിന്ന് 800 മുതൽ 1200 മെഗാവാട്ട് വരെ വൈദ്യുതി ലഭ്യമാകുമെന്നാണ് കെ.എസ്.ഇ.ബി ചൂണ്ടിക്കാട്ടുന്നത്.

മുഖ്യമന്ത്രിയുടെ വിശദീകരണം:

എന്നാൽ ഹിമാചലിൽ നിന്ന് ഉയർന്ന വിലയ്ക്ക് വൈദ്യുതി വാങ്ങുമ്പോഴുണ്ടാകുന്ന 2232 കോടി രൂപയുടെ വലിയ സാമ്പത്തിക ബാധ്യത ഒഴിവാക്കാനാണ് ജി.എൻ.എ വഴി വൈദ്യുതി വാങ്ങാൻ തീരുമാനിച്ചതെന്ന് മുഖ്യമന്ത്രി വി.ഡി. സതീശൻ വ്യക്തമാക്കി. മന്ത്രിസഭാ യോഗത്തിന് ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം.

വൈദ്യുതി വാങ്ങുന്നതുമായി ബന്ധപ്പെട്ട് രണ്ട് ഫയലുകളാണ് സർക്കാരിന് മുന്നിലെത്തിയത്. ഹിമാചൽ പ്രദേശിൽ നിന്ന് യൂണിറ്റിന് 14.50 രൂപ നിരക്കിൽ വാങ്ങാനുള്ളതും, രണ്ടാമത്തേത് ജി.എൻ.എ എന്ന സ്വകാര്യ കമ്പനിയിൽ നിന്ന് 8.63 രൂപ – 8.90 രൂപ നിരക്കിൽ വാങ്ങാനുള്ളതുമായിരുന്നു അത്. പവർ ട്രേഡിങ് കോർപ്പറേഷൻ വഴിയാണ് ഈ ഇടപാടുകൾ നടക്കുന്നത്. 8 രൂപയ്ക്ക് ലഭിക്കുന്ന വൈദ്യുതി ഒഴിവാക്കി 14 രൂപയ്ക്ക് വാങ്ങിയാൽ അത് സർക്കാരിന് താങ്ങാനാകില്ലെന്നും കുറഞ്ഞ നിരക്കിൽ വൈദ്യുതി ലഭ്യമാക്കാനാണ് സർക്കാർ മുൻഗണന നൽകുന്നതെന്നും അദ്ദേഹം പറഞ്ഞു. പീക്ക് സമയങ്ങളിൽ ഹിമാചലിൽ നിന്ന് 353 മെഗായൂണിറ്റ് വൈദ്യുതി ലഭിക്കുമ്പോൾ ജി.എൻ.എയിൽ നിന്ന് 453 മെഗായൂണിറ്റ് വൈദ്യുതി കിട്ടുമെന്നും മുഖ്യമന്ത്രി ചൂണ്ടിക്കാട്ടി.

മുൻപ് പിണറായി വിജയൻ മുഖ്യമന്ത്രിയായിരുന്ന 2025-ലും ഇതേ കമ്പനിയിൽ നിന്ന് വൈദ്യുതി വാങ്ങിയിട്ടുണ്ടെന്നും വി.ഡി. സതീശൻ പറഞ്ഞു. അദ്ദേഹത്തിന്റെ കാലത്ത് എൻ.ടി.പി.സിയിൽ നിന്ന് വളരെ കുറഞ്ഞ അളവിൽ മാത്രം വൈദ്യുതി വാങ്ങുകയും, ബാക്കി ഭൂരിഭാഗവും ജി.എൻ.എ, അദാനി, ജിൻഡാൽ ഉൾപ്പെടെയുള്ള സ്വകാര്യ കമ്പനികളിൽ നിന്ന് വാങ്ങുകയുമാണ് ചെയ്തത്. കഴിഞ്ഞ രണ്ടുമാസമായി സംസ്ഥാനം സ്വകാര്യ കമ്പനികളിൽ നിന്ന് തന്നെയാണ് വൈദ്യുതി വാങ്ങുന്നതെന്നും കെ.എസ്.ഇ.ബി ഭൂരിഭാഗം വൈദ്യുതിയും വാങ്ങുന്നത് ഇത്തരം കമ്പനികളിൽ നിന്നാണെന്നും മുഖ്യമന്ത്രി കൂട്ടിച്ചേർത്തു.