തിരുവനന്തപുരം: സെക്രട്ടേറിയറ്റിന് മുന്നിൽ എൽ.പി.എസ്.ടി (LPST) ഉദ്യോഗാർഥികൾ നടത്തുന്ന സമരം കൂടുതൽ ശക്തമാകുന്നു. സമരത്തിന് ഐക്യദാർഢ്യം പ്രഖ്യാപിച്ച് സി.ജെ.പി (CJP) പ്രവർത്തകരും നാളെ മുതൽ നിരാഹാര സമരമാരംഭിക്കും. സി.ജെ.പി സൗത്ത് ഹെൽത്ത് കോർഡിനേറ്റർമാരും കേരള ഘടകം പ്രവർത്തകരുമായ ഫിറോസ് ഖാൻ, സനൂപ് എന്നിവരാണ് നാളെ മുതൽ സമരപ്പന്തലിൽ നിരാഹാരമിരിക്കുന്നത്.
റാങ്ക് പട്ടികയിലുള്ള ഉദ്യോഗാർഥികൾക്ക് നീതി ഉറപ്പാക്കുക, നിയമന പ്രതിസന്ധി പരിഹരിക്കുക എന്നീ ആവശ്യങ്ങളുന്നയിച്ച് ഉദ്യോഗാർഥികൾ നടത്തുന്ന പ്രതിഷേധം 122-ാം ദിവസത്തിലേക്ക് കടന്നിരിക്കുകയാണ്. സമരസമിതി സെക്രട്ടറി വളർമതി നടത്തുന്ന നിരാഹാര സമരം പത്താം ദിവസവും തുടരുന്നു. എന്നാൽ, ഉദ്യോഗാർഥികളുടെ പ്രധാന ആവശ്യമായ ‘അധ്യാപക-വിദ്യാർഥി അനുപാതം’ കുറയ്ക്കാൻ കഴിയില്ലെന്ന കർശന നിലപാടിലാണ് സർക്കാർ ഇപ്പോഴുമുള്ളത്.
ഡി.വൈ.എഫ്.ഐ, യുവമോർച്ച, എ.ബി.വി.പി, എ.ഐ.എസ്.എ, എസ്.യു.സി.ഐ തുടങ്ങിയ യുവജന സംഘടനകളും അധ്യാപക സംഘടനയായ കെ.എസ്.ടി.എയും ഇതിനോടകം തന്നെ സമരത്തിന് പിന്തുണ പ്രഖ്യാപിച്ചിരുന്നു. ഇതിന് പിന്നാലെയാണ് സി.ജെ.പിയും സമരത്തിന്റെ ഭാഗമാകുന്നത്. മുഖ്യമന്ത്രി വി.ഡി. സതീശൻ, കെ.സി. വേണുഗോപാൽ തുടങ്ങിയ നേതാക്കൾ മുൻപ് നൽകിയ വാഗ്ദാനങ്ങൾ സമരപ്പന്തലിൽ പ്രദർശിപ്പിച്ചുകൊണ്ട് ഉദ്യോഗാർഥികൾ കഴിഞ്ഞ ദിവസം ‘ചലോ കേരള മാർച്ച്’ സംഘടിപ്പിച്ചിരുന്നു. കൂടുതൽ സംഘടനകളുടെ പിന്തുണ ലഭിച്ചതോടെ സെക്രട്ടേറിയറ്റിന് മുന്നിലെ ഉദ്യോഗാർഥികളുടെ സമരം വലിയ ജനശ്രദ്ധ നേടുകയാണ്.
+ There are no comments
Add yours