മുഖ്യ തിരഞ്ഞെടുപ്പ് കമ്മീഷണറുടെ രാജി: പ്രതിപക്ഷം ഇന്നും തെരുവിൽ; എം.പിമാരോട് ഡൽഹിയിൽ തുടരാൻ മല്ലികാർജുൻ ഖർഗെ

ന്യൂഡൽഹി: മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഇന്ത്യാ സഖ്യം നടത്തുന്ന പ്രക്ഷോഭങ്ങൾ രണ്ടാം ദിനത്തിലേക്ക്. ഡൽഹിയിൽ തുടരാൻ മുഴുവൻ എം.പിമാർക്കും കോൺഗ്രസ് അധ്യക്ഷൻ മല്ലികാർജുൻ ഖർഗെ നിർദ്ദേശം നൽകി. ഇന്ത്യാ സഖ്യത്തിലെ പ്രമുഖ നേതാക്കളുമായി കൂടിയാലോചിച്ച ശേഷം തുടർസമര പരിപാടികൾക്ക് രൂപം നൽകും. കേന്ദ്രത്തിലെ മോദി ഭരണത്തിന്റെ 25 വർഷങ്ങൾ പൂർത്തിയാകുന്ന പശ്ചാത്തലത്തിൽ കൂടി പ്രക്ഷോഭം ശക്തമാക്കാനാണ് പ്രതിപക്ഷ നീക്കം.

ഇതിന്റെ ഭാഗമായി രാവിലെ 10 മണിക്ക് തിരഞ്ഞെടുപ്പ് കമ്മീഷൻ ഓഫീസിലേക്ക് 150-ഓളം എം.പിമാർ പങ്കെടുക്കുന്ന മാർച്ച് സംഘടിപ്പിക്കും. അതേസമയം, ആം ആദ്മി പാർട്ടിയും (AAP) ഡി.എം.കെയും ഇന്നത്തെ മാർച്ചിൽ പങ്കെടുക്കില്ല. കഴിഞ്ഞ ദിവസം ആകാശവാണി ആസ്ഥാനത്തിന് സമീപം മുൻകൂട്ടി കൂടിയാലോചിക്കാതെ കോൺഗ്രസ് കുത്തിയിരിപ്പ് സമരം സംഘടിപ്പിച്ചതിൽ സഖ്യകക്ഷികൾക്കിടയിൽ അമർഷമുണ്ട്. ഡൽഹിയിലെ ഇന്ത്യാ സഖ്യ കക്ഷികൾ ഇന്ന് ജില്ലാതലത്തിലും പ്രതിഷേധ പരിപാടികൾ സംഘടിപ്പിക്കും.

അതിനിടെ, ഇന്നലത്തെ പ്രതിഷേധ സംഭവങ്ങളിൽ രാഹുൽ ഗാന്ധി ഉൾപ്പെടെയുള്ള നേതാക്കൾക്കെതിരെ പോലീസ് കേസെടുത്തേക്കും. കസ്റ്റഡിയിലെടുത്ത രാഹുൽ ഗാന്ധിയെയും പ്രിയങ്ക ഗാന്ധിയെയും രണ്ടു മണിക്കൂറിന് ശേഷമാണ് വിട്ടയച്ചത്. കൂടുതൽ ശക്തമായ പോരാട്ടങ്ങളുമായി തിരിച്ചെത്തുമെന്ന മുന്നറിയിപ്പ നൽകിയാണ് നേതാക്കൾ മടങ്ങിയത്. രാഹുൽ ഗാന്ധി അടക്കമുള്ള നേതാക്കളെ അറസ്റ്റ് ചെയ്തതിൽ പ്രതിഷേധിച്ച് കേരളത്തിലും വിപുലമായ പ്രതിഷേധത്തിന് കെ.പി.സി.സി അധ്യക്ഷൻ സണ്ണി ജോസഫ് ആഹ്വാനം ചെയ്തു. കോൺഗ്രസ് മണ്ഡലം കമ്മിറ്റികളുടെ നേതൃത്വത്തിൽ വൈകുന്നേരം സംസ്ഥാന വ്യാപകമായി പ്രതിഷേധ പ്രകടനങ്ങൾ നടക്കും.