സഹപൈലറ്റിന്റെ ആക്രമണം: ഫ്ലൈദുബായ് ഇന്ത്യൻ പൈലറ്റിന്റെ തലയോട്ടിക്ക് ഗുരുതര പരിക്ക്; അടിയന്തര ശസ്ത്രക്രിയയ്ക്ക് വിധേയനായി

അബുദാബി: ഫ്ലൈദുബായ് വിമാനത്തിൽ വെച്ച് സഹപൈലറ്റിന്റെ ആക്രമണത്തിനിരയായ ഇന്ത്യൻ പൈലറ്റ് ക്യാപ്റ്റൻ സ്മിത് മച്ചാറിന്റെ ആരോഗ്യനിലയിൽ പുരോഗതി. ആക്രമണത്തിൽ അദ്ദേഹത്തിന്റെ തലയോട്ടിക്ക് ഗുരുതരമായി പരിക്കേറ്റതായും (ഡിപ്രസ്ഡ് ഫ്രാക്ചർ – തലയോട്ടിയുടെ ഒരു ഭാഗം അകത്തേക്ക് അമർന്നുപോകുന്ന അവസ്ഥ), സൗദി അറേബ്യയിൽ വെച്ച് അടിയന്തര ശസ്ത്രക്രിയയ്ക്ക് വിധേയനായതായും എൻ.ഡി.ടി.വി റിപ്പോർട്ട് ചെയ്തു. തുടർചികിത്സയ്ക്കായി യു.എ.ഇയിലെത്തിച്ച ഇദ്ദേഹം ഇപ്പോൾ അബുദാബിയിലെ മിലിട്ടറി ആശുപത്രിയിൽ വിദഗ്ധ ഡോക്ടർമാരുടെ നിരീക്ഷണത്തിലാണ്.

തലയ്ക്ക് പുറമെ കൈകാലുകൾ, നെഞ്ച്, വയറിന്റെ മുകൾഭാഗം എന്നിവിടങ്ങളിലും അദ്ദേഹത്തിന് പരിക്കേറ്റിട്ടുണ്ട്. നിലവിൽ അദ്ദേഹം ചികിത്സയോട് നന്നായി പ്രതികരിക്കുന്നുണ്ടെന്നാണ് മെഡിക്കൽ റിപ്പോർട്ടുകൾ വ്യക്തമാക്കുന്നത്.

വൻ ദുരന്തം ഒഴിവായത് ക്യാപ്റ്റന്റെ സമയോചിതമായ ഇടപെടലിൽ

കഴിഞ്ഞ ദിവസം 170-ലധികം യാത്രക്കാരുമായി ദുബായിൽ നിന്ന് ടെൽ അവീവിലേക്ക് പോയ ഫ്ലൈദുബായ് FZ1073 വിമാനത്തിലാണ് നാടകീയമായ സംഭവങ്ങൾ അരങ്ങേറിയത്. ഒമാൻ സ്വദേശിയായ സഹപൈലറ്റ് ഹമദ് അൽ-ഹമ്മാമി കോക്പിറ്റിനുള്ളിൽ വെച്ച് ക്യാപ്റ്റനെ ആക്രമിക്കുകയും വിമാനം തകർക്കാൻ ശ്രമിക്കുകയുമായിരുന്നു. ഇതിനിടെ വിമാനം ഏകദേശം 18,000 അടിയോളം താഴേക്ക് പതിച്ചു.

കടുത്ത വേദനയും രക്തസ്രാവവും വകവെക്കാതെ ക്യാപ്റ്റൻ സ്മിത് മച്ചാർ കോക്പിറ്റിന്റെ വാതിൽ തുറന്നതാണ് വൻ ദുരന്തം ഒഴിവാക്കിയത്. വാതിൽ തുറന്നതോടെ വിമാനത്തിലെ ജീവനക്കാരും യാത്രക്കാരും കോക്പിറ്റിലേക്ക് ഇരച്ചുകയറി സഹപൈലറ്റിനെ കീഴ്പ്പെടുത്തി. തുടർന്ന് സൗദി അറേബ്യയിലെ തബൂക്കിലുള്ള പ്രിൻസ് സുൽത്താൻ ബിൻ അബ്ദുൽ അസീസ് അന്താരാഷ്ട്ര വിമാനത്താവളത്തിൽ വിമാനം അടിയന്തരമായി ലാൻഡ് ചെയ്യുകയായിരുന്നു.

കഴിഞ്ഞ ദിവസം പ്രധാനമന്ത്രി നരേന്ദ്ര മോദിയുമായി ക്യാപ്റ്റൻ സ്മിത് മച്ചാർ വീഡിയോ കോളിലൂടെ സംസാരിച്ചിരുന്നു. തനിക്ക് ഗുരുതരമായി പരിക്കേൽക്കുകയും വിമാനം താഴേക്ക് പതിക്കുകയും ചെയ്ത ജീവൻമരണ പോരാട്ടത്തിനിടയിലും, യാത്രക്കാരുടെ ജീവൻ രക്ഷിക്കാനാണ് കോക്പിറ്റിന്റെ വാതിൽ തുറക്കാൻ താൻ അവസാന ശ്രമം നടത്തിയതെന്ന് അദ്ദേഹം പ്രധാനമന്ത്രിയോട് വിശദീകരിച്ചു.