മാവേലിക്കര: അമ്മയുടെ ആൺസുഹൃത്ത് അതിക്രൂരമായി തറയിലടിച്ച് കൊലപ്പെടുത്തിയ ഒന്നരവയസുകാരിയുടെ പോസ്റ്റ്മോർട്ടം റിപ്പോർട്ട് വിവരങ്ങൾ പുറത്ത്. തലയ്ക്കേറ്റ ഗുരുതരമായ ക്ഷതമാണ് കുഞ്ഞിന്റെ മരണകാരണമെന്ന് റിപ്പോർട്ടിൽ വ്യക്തമാക്കുന്നു. ഇതിന് പുറമെ അതിക്രൂരമായ ശാരീരിക പീഡനമാണ് പിഞ്ചുകുഞ്ഞിന് നേരിടേണ്ടി വന്നതെന്നും പോസ്റ്റ്മോർട്ടം കണ്ടെത്തലുകൾ സൂചിപ്പിക്കുന്നു.
ശരീരമാസകലം പരിക്കുകൾ; കൈ പിടിച്ചുതിരിച്ചു
കുഞ്ഞിന്റെ ശരീരമാസകലം മർദ്ദനമേറ്റതിന്റെ പാടുകളുണ്ടെന്നാണ് പരിശോധനയിൽ കണ്ടെത്തിയത്. നഖംകൊണ്ട് ആഴത്തിൽ നുള്ളിയതിന്റെ പാടുകളും ശരീരത്തിലുണ്ട്. കുഞ്ഞിന്റെ കൈയ്ക്ക് പിടിച്ച് തിരിച്ചതിനെ തുടർന്ന് ക്ഷതമേറ്റിട്ടുണ്ട്. ഇതിനുപുറമെ വായ്ക്കുള്ളിൽ രക്തസ്രാവം ഉണ്ടായതായും പോസ്റ്റ്മോർട്ടം റിപ്പോർട്ടിൽ പറയുന്നു.
ദാരുണാന്ത്യം വാടക വീട്ടിൽ വെച്ച്
കഴിഞ്ഞ ശനിയാഴ്ച രാത്രി മാങ്കാങ്കുഴിയിലെ വാടക വീട്ടിൽവെച്ചാണ് നാടിനെ നടുക്കിയ കൊലപാതകം നടന്നത്. അമ്മയുടെ ആൺസുഹൃത്തായ അസം സ്വദേശി പരിതോഷ് കുഞ്ഞിനെ തറയിലടിച്ച് കൊലപ്പെടുത്തുകയായിരുന്നു. സംഭവത്തിന് പിന്നാലെ വീടിന് സമീപത്തുള്ള സ്വകാര്യ ക്ലിനിക്കിലും പിന്നീട് മാവേലിക്കര താലൂക്ക് ആശുപത്രിയിലും കുട്ടിയെ എത്തിച്ചെങ്കിലും ജീവൻ രക്ഷിക്കാനായില്ല.
പോസ്റ്റ്മോർട്ടം നടപടികൾ പൂർത്തിയായ സാഹചര്യത്തിൽ കുഞ്ഞിന്റെ മൃതദേഹം ഇന്ന് മാവേലിക്കര തഴക്കര പൊതുസ്മശാനത്തിൽ സംസ്കരിക്കും. കുറ്റാരോപിതനായ പരിതോഷിനെതിരെ പോലീസ് കർശന നിയമനടപടികൾ സ്വീകരിച്ചു വരികയാണ്.




+ There are no comments
Add yours