തിരുവനന്തപുരം: സംസ്ഥാനത്ത് സർക്കാരിനെ വെട്ടിലാക്കിയ ബാർ ലൈസൻസ് വിവാദങ്ങൾക്കൊടുവിൽ എക്‌സൈസ് കമ്മിഷണർ ശ്രീറാം സാംബശിവറാവുവിനെ സ്ഥാനത്ത് നിന്ന് നീക്കി. മന്ത്രി അറിയാതെയുള്ള ഉദ്യോഗസ്ഥരുടെ തുടർച്ചയായ നടപടികളിൽ എക്‌സൈസ് വകുപ്പ് മന്ത്രി എം. ലിജു കടുത്ത അതൃപ്തി രേഖപ്പെടുത്തിയതിന് പിന്നാലെയാണ് ഈ അടിയന്തര മാറ്റം.
പ്രകോപനമായത് മന്ത്രി അറിയാതെയുള്ള തീരുമാനങ്ങൾ
നെടുമ്പാശ്ശേരി വിമാനത്താവളത്തിൽ പുതിയ ബാർ ലൈസൻസ് അനുവദിച്ചതും, മൂന്ന് ബിയർ-വൈൻ പാർലറുകൾക്ക് ബാർ പദവി നൽകിയ നടപടിയിൽ ഉദ്യോഗസ്ഥരെ കമ്മിഷണർ പിന്തുണച്ചതുമാണ് വകുപ്പിൽ പ്രശ്നങ്ങൾക്ക് കാരണമായത്. സർക്കാരിനെയോ മന്ത്രിയെയോ അറിയിക്കാതെയാണ് ഉദ്യോഗസ്ഥർ ഈ സുപ്രധാന തീരുമാനങ്ങൾ കൈക്കൊണ്ടത്. സിസ്റ്റം ക്ലിയർ ചെയ്യുന്നതിന്റെ ഭാഗമായി വകുപ്പിൽ പല മാറ്റങ്ങളും ഉടൻ ഉണ്ടാകുമെന്ന് മന്ത്രി എം. ലിജു നേരത്തെ തന്നെ പരസ്യമായി മുന്നറിയിപ്പ് നൽകിയിരുന്നു.
നിയമവിരുദ്ധമായി ഒന്നും ചെയ്തിട്ടില്ലെന്ന് കമ്മിഷണർ
അതേസമയം, വിവാദങ്ങളിൽ തന്റെ ഭാഗം ന്യായീകരിച്ച് ശ്രീറാം സാംബശിവറാവുവും രംഗത്തെത്തിയിരുന്നു. താൻ നിയമവിരുദ്ധമായി യാതൊന്നും ചെയ്തിട്ടില്ലെന്നും, നിലവിലുള്ള നിയമങ്ങൾക്കും ചട്ടങ്ങൾക്കും അനുസരിച്ച് മാത്രമാണ് വകുപ്പിലെ കാര്യങ്ങൾ ചെയ്തതെന്നുമാണ് അദ്ദേഹത്തിന്റെ വിശദീകരണം.
രാഷ്ട്രീയ പോരും പുതിയ മദ്യനയവും
മന്ത്രി അറിയാതെയുള്ള എക്‌സൈസ് വകുപ്പിലെ ഉദ്യോഗസ്ഥ നീക്കങ്ങൾ പ്രതിപക്ഷവും രാഷ്ട്രീയ ആയുധമാക്കിയിരുന്നു. ‘അതൃപ്തി പറയാൻ മാത്രമായി ഒരു മന്ത്രി വേണോ’ എന്നായിരുന്നു മുൻ എക്‌സൈസ് മന്ത്രിയുടെ പരിഹാസം. എന്നാൽ, എം.ബി രാജേഷും എൽ.ഡി.എഫ് സർക്കാരും വരുത്തിവെച്ച പഴയ സിസ്റ്റത്തോടാണ് തനിക്ക് അതൃപ്തിയെന്നായിരുന്നു എം. ലിജു ഇതിന് നൽകിയ മറുപടി.
ഇതിനിടെ, യു.ഡി.എഫ് സർക്കാരിന്റെ പുതിയ മദ്യനയം ഈ മാസം 30-നകം പ്രഖ്യാപിച്ചേക്കുമെന്നാണ് വിവരം. ഈ പുതിയ മദ്യനയം വരുന്നതിന് തൊട്ടുമുൻപായി നടന്ന ഉദ്യോഗസ്ഥ മാറ്റത്തിൽ മന്ത്രിസഭയ്ക്കുള്ളിലും ചില ഭിന്നാഭിപ്രായങ്ങൾ ഉയർന്നിട്ടുണ്ട്.
+ There are no comments
Add yours