ആലപ്പുഴ എസ് ഡി കോളേജിൽ ചോദ്യപേപ്പർ മാറിനൽകി; പരീക്ഷാഫലം തടഞ്ഞുവച്ച് സർവകലാശാല; പ്രതിഷേധവുമായി വിദ്യാർഥികൾ
ആലപ്പുഴ എസ് ഡി കോളേജിൽ നാല് വർഷ ബിരുദ വിദ്യാർഥികളുടെ ഒന്നാം സെമസ്റ്റർ പരീക്ഷ ചോദ്യപേപ്പർ മാറിയത് വിവാദത്തിൽ.
ജനുവരി 8,12,14 തീയതികളിൽ വിവിധ ഡിപ്പാർട്ടുമെന്റുകളിലായി പരീക്ഷയെഴുതിയ 188 വിദ്യാർഥികൾക്കാണ് ചോദ്യപേപ്പർ മാറി നൽകിയത്.
സപ്ലിമെന്‍ററി എഴുതാൻ എത്തിയ വിദ്യാർഥികൾക്ക് റെഗുലർ പരീക്ഷയുടെ ചോദ്യപേപ്പറാണ് നൽകിയത്.
മൂല്യനിർണയത്തിനിടെ അധ്യാപകർക്ക് തോന്നിയ സംശയത്തിന് പിന്നാലെയാണ് ഗുരുതര വീഴ്ച കണ്ടെത്തിയത്.
സിലബസുകൾ തമ്മിൽ നേരിയ വ്യത്യാസം മാത്രമുള്ളതിനാൽ ചോദ്യപേപ്പർ മാറ്റം പരീക്ഷയെഴുതിയ സമയത്ത് കുട്ടികൾക്ക് പോലും മനസ്സിലായില്ല.
മൂല്യനിർണയത്തിൽ പിഴവ് കണ്ടെത്തിയ അധ്യാപകരാണ് കോളജ് അധികൃതർ മുഖേന ഈമാസം 22ന് കേരള സർവകലാശാല അധികൃതർക്ക് പരാതി നൽകിയത്.
സംഭവത്തെ തുടർന്ന് പരീക്ഷാഫലം സർവകലാശാല തടഞ്ഞുവച്ചു
പ്രശ്നപരിഹാരത്തിനുള്ള നീക്കങ്ങളും ആരംഭിച്ചിട്ടുണ്ട്
കോളേജ് അധികൃതരുടെ പിഴവിനെത്തുടർന്നാണ് പരീക്ഷാഫലം സർവകലാശാല തടഞ്ഞുവച്ചതെന്ന് എസ് എഫ് ഐ ആരോപിച്ചു.
വിദ്യാർഥികളുടെ നേതൃത്വത്തിൽ പ്രിൻസിപ്പൽ ഇൻ ചാർജ് ഡോ.വി ആർ പ്രഭാകരൻ നായരെ തടഞ്ഞുവച്ച് പ്രതിഷേധിച്ചു.
അതേസമയം പ്രതിഷേധം ആസൂത്രിതമാണെന്ന് കോളേജ് അധികൃതർ വ്യക്തമാക്കി.
+ There are no comments
Add yours