തിരുവനന്തപുരം: സംസ്ഥാനത്ത് മന്ത്രിസഭാ പുനഃസംഘടന നടത്തേണ്ട യാതൊരു സാഹചര്യവുമില്ലെന്നും, നിലവിൽ ഭാരിച്ച ചുമതലകളുള്ളതിനാൽ കെ.പി.സി.സി പ്രസിഡന്റ് സ്ഥാനത്തേക്ക് താനില്ലെന്നും വ്യക്തമാക്കി മന്ത്രി കെ. മുരളീധരൻ. മന്ത്രിസഭയിൽ നിന്ന് ആരെങ്കിലും കെ.പി.സി.സി അധ്യക്ഷ സ്ഥാനത്തേക്ക് എത്തുമോ എന്ന മാധ്യമപ്രവർത്തകരുടെ ചോദ്യത്തോട് പ്രതികരിക്കുകയായിരുന്നു അദ്ദേഹം. തിരുവിതാംകൂർ ദേവസ്വം ബോർഡ് ആസ്ഥാനത്ത് ശബരിമല മണ്ഡലകാല ഫെസ്റ്റിവൽ കൺട്രോൾ റൂം ഉദ്ഘാടനം ചെയ്ത ശേഷം സംസാരിക്കുകയായിരുന്നു മന്ത്രി.
ശബരിമലയിൽ വിപുലമായ ഒരുക്കങ്ങൾ
ശബരിമലയിലെ തിരക്ക് നിയന്ത്രിക്കാൻ ആവശ്യമായ എല്ലാ സജ്ജീകരണങ്ങളും ഇതിനോടകം പൂർത്തിയായിട്ടുണ്ട്. സർക്കാരിന്റെ ഭാഗത്ത് നിന്നുള്ള എല്ലാ കാര്യങ്ങളും കൃത്യമായി ചെയ്തിട്ടുണ്ട്. ദേവസ്വം ബോർഡിന്റെ പ്രവർത്തനങ്ങളിൽ പൂർണ്ണ തൃപ്തിയുണ്ട്. എല്ലാ വിവരങ്ങളും ബോർഡ് സർക്കാരിനെ അറിയിക്കുന്നുണ്ട്. ഈ മാസം 16-ന് താൻ നേരിട്ടെത്തി കാര്യങ്ങൾ വിലയിരുത്തും. ദേവസ്വം ബോർഡിന് സർക്കാരിന്റെ പൂർണ്ണ പിന്തുണയുണ്ടാകുമെന്നും അദ്ദേഹം ഉറപ്പുനൽകി.
ഭക്തർക്ക് പരമാവധി സൗകര്യങ്ങളൊരുക്കുകയാണ് സർക്കാരിന്റെ ലക്ഷ്യം. അരവണ നിർമ്മാണ പ്ലാന്റിലെ ജീവനക്കാർ 24 മണിക്കൂറും വിശ്രമമില്ലാതെയാണ് ജോലി ചെയ്യുന്നത്. പ്രായം പോലും വകവെയ്ക്കാതെയാണ് ദേവസ്വം ബോർഡ് പ്രസിഡന്റ് കാൽനടയായി മലകയറി കാര്യങ്ങൾ വിലയിരുത്തുന്നത്. ഈ സീസൺ കഴിഞ്ഞ് നട അടച്ചാൽ ഉടൻ തന്നെ അടുത്ത വർഷത്തേക്കുള്ള ദീർഘകാല പദ്ധതികൾ തയ്യാറാക്കി തുടങ്ങുമെന്നും മന്ത്രി കൂട്ടിച്ചേർത്തു.
നഴ്സുമാരെക്കുറിച്ചുള്ള വിവാദ പരാമർശത്തിൽ വിശദീകരണം
സംസ്ഥാനത്തിന് പുറത്ത് പഠിച്ച നഴ്സുമാരെക്കുറിച്ച് കഴിഞ്ഞ ദിവസം താൻ നടത്തിയ പരാമർശത്തിലും മന്ത്രി വിശദീകരണം നൽകി. എല്ലാ നഴ്സുമാരെയും ഉദ്ദേശിച്ചല്ല താൻ അത്തരമൊരു പ്രതികരണം നടത്തിയത്. സ്വന്തമായി ആശുപത്രികൾ പോലുമില്ലാത്ത അടിസ്ഥാന സൗകര്യങ്ങളില്ലാത്ത നഴ്സിംഗ് സ്ഥാപനങ്ങളിൽ നിന്ന് പഠിച്ചിറങ്ങുന്നവരുണ്ട്. ഇവർക്ക് ജോലിയിൽ സംഭവിക്കാനിടയുള്ള പിഴവുകളെക്കുറിച്ചാണ് താൻ സൂചിപ്പിച്ചത്. എല്ലാ കാര്യങ്ങളിലും കുറ്റം മാത്രം കാണുന്ന സമീപനം ശരിയല്ലെന്നും, വകുപ്പിന്റെ പ്രവർത്തനങ്ങൾ വളരെ ശുഷ്കാന്തിയോടെയാണ് മുന്നോട്ട് പോകുന്നതെന്നും കെ. മുരളീധരൻ വ്യക്തമാക്കി.
+ There are no comments
Add yours