സസ്പെൻഷന് കാരണം നാടകം കളിച്ചത്, 60% ഹാജറുണ്ടായിരുന്നു; കാലടി സർവകലാശാലയുടെ വാദങ്ങൾ തള്ളി വിദ്യാർത്ഥികൾ വീണ്ടും ഹൈക്കോടതിയിൽ

കൊച്ചി: പരീക്ഷയെഴുതാൻ മതിയായ ഹാജരില്ലെന്ന കാലടി സംസ്കൃത സർവകലാശാലയുടെ വാദങ്ങൾ തള്ളി സസ്പെൻഷനിലായ വിദ്യാർത്ഥികൾ. നടപടിക്ക് മുൻപ് തങ്ങൾക്ക് 60 ശതമാനം ഹാജർ ഉണ്ടായിരുന്നെന്ന് വ്യക്തമാക്കി വിദ്യാർത്ഥികൾ ഹൈക്കോടതി സിംഗിൾ ബെഞ്ചിന് മുമ്പാകെ പുതിയ ഹർജി നൽകി. ക്യാമ്പസിൽ നാടകം കളിച്ചതിന്റെ പേരിലാണ് സർവകലാശാല തങ്ങൾക്കെതിരെ പ്രതികാര നടപടി സ്വീകരിച്ചതെന്നും വിദ്യാർത്ഥികൾ ഹർജിയിൽ ആരോപിക്കുന്നു.

കൺഡോണേഷൻ നിഷേധിച്ചു; വിചിത്ര നടപടി

സസ്പെൻഷന് മുൻപ് 60 ശതമാനം ഹാജർ ഉണ്ടായിരുന്നെന്നും, ബാക്കി ആവശ്യമായ 15 ശതമാനത്തിന് കൺഡോണേഷൻ (Condonation) അപേക്ഷ നൽകിയാൽ മതിയായിരുന്നെന്നും വിദ്യാർത്ഥികൾ വ്യക്തമാക്കുന്നു. എന്നാൽ ഇതിനായി കോളേജിൽ പ്രവേശിക്കാൻ അധികൃതർ അനുവദിച്ചില്ല. ഒരേ വിഷയത്തിൽ തന്നെ തങ്ങൾക്കെതിരെ രണ്ട് കേസുകളെടുത്ത സർവകലാശാലയുടെ നടപടി തികച്ചും വിചിത്രമാണെന്നും, ഈ വസ്തുതകൾ കൂടി പരിഗണിക്കണമെന്നും സിംഗിൾ ബെഞ്ചിന് നൽകിയ ഹർജിയിൽ വിദ്യാർത്ഥികൾ ആവശ്യപ്പെട്ടിട്ടുണ്ട്.

സുപ്രീംകോടതി നിർദ്ദേശപ്രകാരം നിയമപോരാട്ടം

പരീക്ഷയെഴുതാൻ അനുവദിക്കണമെന്ന ആവശ്യവുമായി സുപ്രീംകോടതിയുടെ നിർദ്ദേശപ്രകാരമാണ് വിദ്യാർത്ഥികൾ വീണ്ടും ഹൈക്കോടതി സിംഗിൾ ബെഞ്ചിനെ സമീപിച്ചിരിക്കുന്നത്. നേരത്തെ കേസ് പരിഗണിച്ച സിംഗിൾ ബെഞ്ച് വിദ്യാർത്ഥികൾക്ക് അനുകൂലമായി പരീക്ഷയെഴുതാൻ അനുമതി നൽകിയിരുന്നു. എന്നാൽ നടപടിക്രമങ്ങൾ പാലിക്കാതെയാണ് സിംഗിൾ ബെഞ്ച് വിധി പ്രസ്താവിച്ചതെന്ന് ചൂണ്ടിക്കാട്ടി ഡിവിഷൻ ബെഞ്ച് ഈ ഉത്തരവ് റദ്ദാക്കി. ഇതിനെതിരെയാണ് വിദ്യാർത്ഥികൾ സുപ്രീംകോടതിയെ സമീപിച്ചത്. എന്നാൽ വിഷയത്തിൽ നേരിട്ട് ഇടപെടാൻ വിസമ്മതിച്ച സുപ്രീംകോടതി, കേസ് പരിഗണിക്കാനായി വീണ്ടും ഹൈക്കോടതിയിലേക്ക് തന്നെ മടക്കുകയായിരുന്നു.