തിരുവനന്തപുരം: കേരള ചരിത്ര ഗവേഷണ കൗൺസിൽ (KCHR) ചെയർമാൻ നിയമനവുമായി ബന്ധപ്പെട്ട് വൻ വിവാദം. ഉന്നത വിദ്യാഭ്യാസ പ്രിൻസിപ്പൽ സെക്രട്ടറി ബി. അശോക് ഇടപെട്ട് നിയമന പ്രക്രിയ പൂർണ്ണമായും അട്ടിമറിച്ചെന്നാണ് പുതിയ ആരോപണം. സെർച്ച് കമ്മിറ്റി പരിഗണിക്കാത്ത കോളേജ് അധ്യാപകനെയാണ് ഈ സ്ഥാനത്തേക്ക് നിയമിച്ചതെന്ന പരാതിയുമായി സെർച്ച് കമ്മിറ്റി അംഗം കൂടിയായ പ്രമുഖ ചരിത്രകാരൻ പ്രൊഫ. സനൽ മോഹൻ രംഗത്തെത്തി. ഇതുസംബന്ധിച്ച് അദ്ദേഹം നൽകിയ കത്തിൻ്റെ പകർപ്പ് മാധ്യമങ്ങൾക്ക് ലഭിച്ചു.
കമ്മിറ്റിയെയും ഡയറക്ടറെയും മറികടന്നു
കെ.സി.എച്ച്.ആർ ഡയറക്ടറുടെ ചുമതലയുള്ള കോളേജ് വിദ്യാഭ്യാസ ഡയറക്ടറെ മറികടന്നാണ് ഉന്നത വിദ്യാഭ്യാസ സെക്രട്ടറി നിയമനത്തിൽ ഇടപെട്ടതെന്ന് കത്തിൽ ചൂണ്ടിക്കാട്ടുന്നു. സെർച്ച് കമ്മിറ്റിയിലെ ഒരു അംഗം മാത്രമായ ബി. അശോക് കൺവീനർക്ക് ഏകപക്ഷീയമായി നിർദ്ദേശങ്ങൾ നൽകി നിയമനം സ്വന്തം നിലയ്ക്ക് നടത്തുകയായിരുന്നു. ഇതിലൂടെ മഹാരാജാസ് കോളേജിലെ ചരിത്ര വിഭാഗം അധ്യാപകനായ ഡോ. വിനോദ് കുമാർ കല്ലോലിക്കലിനെയാണ് എല്ലാ നടപടിക്രമങ്ങളും ലംഘിച്ച് ചെയർമാനായി നിയമിച്ചത്.
പ്രഗത്ഭർ ഇരുന്ന പദവിയിൽ കീഴ്‍വഴക്കം ലംഘിച്ചു
മുൻകാലങ്ങളിൽ രാജ്യത്തെ തന്നെ പ്രഗത്ഭരായ ചരിത്രപണ്ഡിതർ മാത്രം അലങ്കരിച്ചിരുന്ന പദവിയാണ് കെ.സി.എച്ച്.ആർ ചെയർമാൻ സ്ഥാനം. എന്നാൽ സെർച്ച് കമ്മിറ്റിയുടെ പരിഗണനാ പട്ടികയിൽ പോലുമില്ലാത്ത ഒരു കോളേജ് അധ്യാപകനെ ഈ ഉന്നത പദവിയിൽ നിയമിച്ചത് വലിയ വിമർശനങ്ങൾക്ക് വഴിവെച്ചിരിക്കുകയാണ്. ഡോ. വിനോദ് കുമാറിന്റെ നിയമനത്തിനെതിരെ കടുത്ത വിയോജിപ്പാണ് പ്രൊഫ. സനൽ മോഹൻ തന്റെ കത്തിൽ രേഖപ്പെടുത്തിയിട്ടുള്ളത്. ഉന്നത ഉദ്യോഗസ്ഥന്റെ അനധികൃത ഇടപെടലിലൂടെ നടന്ന ഈ നിയമനം വരും ദിവസങ്ങളിൽ കൂടുതൽ വിവാദങ്ങൾക്ക് കാരണമായേക്കും.
+ There are no comments
Add yours