തിരുവനന്തപുരം: പാങ്ങപ്പാറയിൽ പതിനേഴുകാരനായ അഭിറാമിനെ ക്രൂരമായി കൊലപ്പെടുത്തിയ കേസിൽ നിർണ്ണായക വിവരങ്ങൾ പുറത്ത്. കൊലപാതകം മുൻകൂട്ടി ആസൂത്രണം ചെയ്തതാണെന്നതിന്റെ വ്യക്തമായ തെളിവുകൾ പ്രതികളുടെ സോഷ്യൽ മീഡിയ ചാറ്റുകളിൽ നിന്ന് പൊലീസിന് ലഭിച്ചു. രണ്ടാം പ്രതിക്കും നാലാം പ്രതിയുടെ പെൺസുഹൃത്തിനും ഈ കൊലപാതകത്തെക്കുറിച്ച് മുൻകൂട്ടി അറിവുണ്ടായിരുന്നുവെന്നാണ് അന്വേഷണ സംഘം വ്യക്തമാക്കുന്നത്.
ഫോണുകൾ ഫോറൻസിക് പരിശോധനയ്ക്ക്
പ്രതികൾ ഡിലീറ്റ് ചെയ്യാൻ വിട്ടുപോയ ചില ചാറ്റുകളിൽ നിന്നാണ് പൊലീസിന് ഗൂഢാലോചനയുടെ ആദ്യ വിവരങ്ങൾ ലഭിച്ചത്. എന്നാൽ പല പ്രധാന വിവരങ്ങളും പ്രതികൾ ഇതിനകം ഡിലീറ്റ് ചെയ്തിട്ടുണ്ട്. ഇത് വീണ്ടെടുക്കുന്നതിനായി (Retrieve) നാല് പ്രതികളുടെയും ഫോണുകൾ ഫോറൻസിക് പരിശോധനയ്ക്ക് അയക്കാൻ തീരുമാനിച്ചു. കൊലപാതകത്തിന്റെ ആസൂത്രണം രണ്ട് ദിവസം മുൻപേ ആരംഭിച്ചിരുന്നതായി നിലവിൽ കസ്റ്റഡിയിലുള്ള മൂന്നാം പ്രതി ആനന്ദ് പൊലീസിന് മൊഴി നൽകിയിട്ടുണ്ട്. ഗൂഢാലോചനയ്ക്കായി തന്റെ ഫോൺ ഒന്നാം പ്രതിക്ക് കൈമാറിയതായും ഇയാൾ സമ്മതിച്ചു.
മൊഴികളിലെ വൈരുദ്ധ്യം കുഴക്കുന്നു
പ്രതികൾ നൽകുന്ന പരസ്പരവിരുദ്ധമായ മൊഴികൾ തെളിവ് ശേഖരണത്തിൽ പൊലീസിന് വലിയ വെല്ലുവിളിയാകുന്നുണ്ട്. പ്രധാന തെളിവായ കൊല്ലപ്പെട്ട അഭിറാമിന്റെ മൊബൈൽ ഫോൺ എവിടെയാണെന്നതിലും, കൊലപ്പെടുത്താൻ ഉപയോഗിച്ച ബെൽറ്റിന്റെ കാര്യത്തിലുമാണ് പ്രതികൾ വ്യത്യസ്ത മൊഴികൾ നൽകുന്നത്. ഈ സാഹചര്യത്തിൽ ഒന്നാം പ്രതിയായ പതിനേഴുകാരനെയും മറ്റ് പ്രധാന പ്രതികളെയും ഒരുമിച്ചിരുത്തി വിശദമായി ചോദ്യം ചെയ്യാനാണ് അന്വേഷണ സംഘത്തിന്റെ നീക്കം.
കാടുവെട്ടിത്തെളിച്ച് തെരച്ചിൽ നടത്തും
ഇതുവരെ കണ്ടെത്താനാകാത്ത അഭിറാമിന്റെ മൊബൈൽ ഫോൺ, വസ്ത്രങ്ങൾ, വാച്ച് എന്നിവയ്ക്കായി കൊലപാതകം നടന്ന സ്ഥലത്തെ കാടുവെട്ടിത്തെളിച്ച് വിശദമായ പരിശോധന നടത്താൻ പൊലീസ് തീരുമാനിച്ചിട്ടുണ്ട്. പ്രതികളെ കസ്റ്റഡിയിൽ വാങ്ങി വരും ദിവസങ്ങളിലും കൂടുതൽ തെളിവെടുപ്പുകൾ തുടരും.
+ There are no comments
Add yours