ഉറുഗ്വേ: അർജന്റീന പ്രസിഡന്റ് ജാവിയർ മിലിയുടെ തീവ്ര സാമ്പത്തിക നയങ്ങൾക്കെതിരെ കടുത്ത വിമർശനവുമായി ലിയോ പതിനാലാമൻ മാർപാപ്പ. രാജ്യത്ത് നടപ്പിലാക്കുന്ന കടുത്ത ചെലവ് ചുരുക്കൽ നടപടികൾ സാധാരണക്കാരെ പ്രതികൂലമായി ബാധിക്കുന്ന ജനദ്രോഹ നയങ്ങളാണെന്ന് അദ്ദേഹം കുറ്റപ്പെടുത്തി. ചരിത്രപരമായ അർജന്റീന സന്ദർശനത്തിനിടെയാണ് തീവ്ര വലതുപക്ഷ നേതാവായ മിലിക്കെതിരെ മാർപാപ്പയുടെ ഈ പരാമർശം. 1987-ൽ ജോൺ പോൾ രണ്ടാമന് ശേഷം, നാല് പതിറ്റാണ്ടുകൾക്കിപ്പുറം ഇതാദ്യമായാണ് ഒരു മാർപാപ്പ ലോകത്ത് ഏറ്റവും കൂടുതൽ കത്തോലിക്കർ അധിവസിക്കുന്ന അർജന്റീന സന്ദർശിക്കുന്നത്.
സാമ്പത്തിക വളർച്ചയുടെ ഗുണഫലങ്ങൾ സമൂഹത്തിലെ എല്ലാവരിലേക്കും എത്തേണ്ടതുണ്ടെന്ന് മാർപാപ്പ ഓർമ്മിപ്പിച്ചു. സാമ്പത്തിക വ്യവസ്ഥ ജനങ്ങളെ സേവിക്കാനുള്ളതാകണം, മറിച്ച് ജനങ്ങൾ സാമ്പത്തിക വ്യവസ്ഥയെ സേവിക്കുന്നവരാകാൻ പാടില്ല. കഠിനാധ്വാനം ചെയ്തിട്ടും കുടുംബത്തിന്റെ ആവശ്യങ്ങൾ നിറവേറ്റാൻ ബുദ്ധിമുട്ടുന്ന സാധാരണക്കാരുടെ ദുരവസ്ഥ അദ്ദേഹം പ്രത്യേകം ചൂണ്ടിക്കാട്ടി. ശാരീരിക-മാനസിക വെല്ലുവിളികൾ നേരിടുന്നവരോടും രോഗികളോടും ഭരണകൂടം പ്രത്യേക പരിഗണന കാണിക്കണമെന്നും അദ്ദേഹം ആവശ്യപ്പെട്ടു. ഭിന്നശേഷിക്കാർക്കുള്ള സഹായധനം സർക്കാർ വെട്ടിക്കുറച്ച നടപടിക്കെതിരെയുള്ള പരോക്ഷ വിമർശനമായാണ് ഇതിനെ വിലയിരുത്തുന്നത്.
പ്രകോപനപരമായ ഭാഷാപ്രയോഗങ്ങൾക്ക് പേരുകേട്ട പ്രസിഡന്റ് മിലിയോട്, വാക്കുകൾ സൂക്ഷ്മതയോടെ ഉപയോഗിക്കണമെന്നും മറ്റുള്ളവരെ കേൾക്കാനുള്ള സന്നദ്ധത കാണിക്കണമെന്നും മാർപാപ്പ ഉപദേശിച്ചു. ജനാധിപത്യം ശക്തിപ്പെടുത്താൻ ഇത് അനിവാര്യമാണെന്നും അദ്ദേഹം വ്യക്തമാക്കി. പ്രസിഡന്റ് മിലിയുടെ ഭരണത്തിൻ കീഴിൽ കഴിഞ്ഞ മൂന്ന് വർഷമായി തുടരുന്ന കടുത്ത സാമ്പത്തിക നിയന്ത്രണങ്ങൾ അർജന്റീനയിൽ വലിയ തോതിലുള്ള സാമൂഹിക ഭിന്നതകൾക്ക് കാരണമായിട്ടുണ്ടെന്നാണ് റിപ്പോർട്ടുകൾ.
+ There are no comments
Add yours