റവയും തേങ്ങയും ശർക്കരയുമുണ്ടോ? നാലുമണി ചായയ്ക്ക് എളുപ്പത്തിലൊരുക്കാം ഈ മധുരപ്പലഹാരം

വൈകുന്നേരങ്ങളിലെ ചായയ്ക്കൊപ്പം കഴിക്കാൻ മധുരമുള്ളൊരു വിഭവമായാലോ? റവയും തേങ്ങയും ശർക്കരയും പ്രധാന ചേരുവകളായി വരുന്ന ഒരു എളുപ്പ പലഹാരത്തിന്റെ റെസിപ്പിയാണിത്. വളരെ കുറഞ്ഞ സമയം കൊണ്ടും ചുരുങ്ങിയ ചേരുവകൾ കൊണ്ടും തയ്യാറാക്കാവുന്ന ഈ വിഭവം കുട്ടികൾക്കും മുതിർന്നവർക്കും ഒരുപോലെ ഇഷ്ടമാകും.

ആവശ്യമായ ചേരുവകൾ:

• വറുത്ത റവ – 1 കപ്പ്
• ശർക്കരപ്പൊടി – 1 കപ്പ്
• തേങ്ങ ചിരകിയത് – 1/2 കപ്പ്
• തേങ്ങാക്കൊത്ത് – ആവശ്യത്തിന്
• നെയ്യ് (അല്ലെങ്കിൽ ബട്ടർ) – 2.5 ചെറിയ സ്പൂൺ
• ഏലക്ക – 3 എണ്ണം
• വെള്ളം – 2 കപ്പ് (ശർക്കരപ്പാനി ആണെങ്കിൽ 1 കപ്പ് മതിയാകും)
• ഉപ്പ് – ഒരു നുള്ള്

തയ്യാറാക്കുന്ന വിധം:

1. ഒരു പാൻ ചൂടാക്കി അതിൽ നെയ്യൊഴിച്ച്, ചെറിയ കഷ്ണങ്ങളാക്കിയ തേങ്ങാക്കൊത്ത് ഇട്ട് നന്നായി മൂപ്പിച്ച് വറുത്ത് കോരി മാറ്റുക.
2. പാനിൽ ബാക്കിയുള്ള നെയ്യിലേക്ക് ചിരകിയ തേങ്ങയും ഏലക്കയും ചേർത്ത് ചെറിയ തീയിൽ നന്നായി വറുത്തെടുക്കുക.
3. ഇതിലേക്ക് ഒരു കപ്പ് ശർക്കരപ്പൊടിയും രണ്ട് കപ്പ് വെള്ളവും ഒരു നുള്ള് ഉപ്പും ചേർത്ത് ഇളക്കി അടച്ചുവെച്ച് തിളപ്പിക്കുക. (ശർക്കര ഉരുക്കിയതാണ് ഉപയോഗിക്കുന്നതെങ്കിൽ ഒരു കപ്പ് വെള്ളം മാത്രം ഒഴിക്കുക).
4. വെള്ളം നന്നായി തിളച്ചു വരുമ്പോൾ തീ കുറച്ചുവെച്ച്, അതിലേക്ക് വറുത്ത റവ കുറേശ്ശെയായി ചേർത്ത് കൊടുക്കാം. കട്ടപിടിക്കാതെ തുടർച്ചയായി ഇളക്കാൻ പ്രത്യേകം ശ്രദ്ധിക്കണം.
5. കൂട്ട് നന്നായി യോജിച്ച് പാകമായി വരുമ്പോൾ, നേരത്തെ വറുത്തുവെച്ച തേങ്ങാക്കൊത്ത് ഇതിന് മുകളിലായി വിതറുക.
6. വീണ്ടും പാൻ അടച്ചുവെച്ച് ചെറിയ തീയിൽ (Low flame) 5 മിനിറ്റ് കൂടി വേവിക്കുക.
7. ശേഷം തീ അണച്ച് പാത്രത്തിലേക്ക് മാറ്റാം. ചെറിയ കഷ്ണങ്ങളാക്കി മുറിച്ച് ചൂടോടെ തന്നെ വിളമ്പാവുന്നതാണ്.