2013-ൽ പുറത്തിറങ്ങിയ മോഹിത് സൂരി ചിത്രം ‘ആഷിഖി 2’-ലെ ഗാനങ്ങൾ ഇന്നും വലിയ ജനപ്രീതിയുള്ളവയാണ്. ചിത്രത്തിൽ ശ്രേയ ഘോഷാൽ ആലപിച്ച ‘സുൻ രഹാ ഹേ നാ തു’ എന്ന ഹിറ്റ് ഗാനത്തിന് പിന്നിലെ റെക്കോർഡിങ് അനുഭവം പങ്കുവെക്കുകയാണ് താരമിപ്പോൾ. ഈ ഗാനം തനിക്ക് രണ്ട് തവണ റെക്കോർഡ് ചെയ്യേണ്ടി വന്നിരുന്നുവെന്നാണ് ശ്രേയ വെളിപ്പെടുത്തുന്നത്.
ആദ്യ തവണ പാടിയപ്പോൾ ഒരു പ്രൊഫഷണൽ ഗായികയുടെ ശൈലിയിൽ വോക്കൽ വേരിയേഷനുകളും അലങ്കാരങ്ങളും നൽകിയാണ് ശ്രേയ ഗാനം പൂർത്തിയാക്കിയത്. എന്നാൽ, ഇത് കഥാപാത്രത്തിന് അനുയോജ്യമല്ലെന്ന് ചൂണ്ടിക്കാട്ടി സംവിധായകൻ മോഹിത് സൂരിയും നിർമ്മാതാവ് മുകേഷ് ഭട്ടും ഗാനം കൂടുതൽ ലളിതമായി വീണ്ടും പാടാൻ ആവശ്യപ്പെടുകയായിരുന്നു.
ചിത്രത്തിൽ ശ്രദ്ധ കപൂർ അവതരിപ്പിക്കുന്ന നായികാ കഥാപാത്രം ശാസ്ത്രീയമായി സംഗീതം പഠിക്കാത്ത, ക്ലബ്ബുകളിലും മറ്റും പാടുന്ന ഒരു തുടക്കക്കാരിയായ ഗായികയാണ്. ആദ്യത്തെ റെക്കോർഡിങ്ങിലെ പ്രൊഫഷണൽ ടച്ച് കഥാപാത്രത്തിന്റെ ഈ പശ്ചാത്തലവുമായി ഒത്തുപോകുന്നതായിരുന്നില്ല. തുടർന്നാണ് സംവിധായകന്റെ നിർദ്ദേശപ്രകാരം വോക്കൽ ആഡംബരങ്ങൾ ഒഴിവാക്കി തികച്ചും ലളിതമായ ശൈലിയിൽ ശ്രേയ ഗാനം വീണ്ടും റെക്കോർഡ് ചെയ്തത്. സിനിമയിൽ പിന്നണി പാടുമ്പോൾ കഥാപാത്രത്തിന്റെ പ്രായവും സംഗീതത്തിലുള്ള അറിവും പരിഗണിച്ച് ആലാപനത്തിൽ മാറ്റം വരുത്തേണ്ടതുണ്ടെന്നും അവർ കൂട്ടിച്ചേർത്തു.
+ There are no comments
Add yours