കാർഷിക മേഖലയിൽ പുതിയ സാങ്കേതികവിദ്യ; രോഗങ്ങളും കീടബാധയും ഇനി ചെടികൾ തന്നെ വിളിച്ചുപറയും, ഒപ്പം ആശങ്കയോടെ കർഷകരും

കാലിഫോർണിയ: കാർഷിക മേഖലയിൽ വിപ്ലവകരമായ മാറ്റങ്ങൾക്ക് വഴിയൊരുക്കി പുതിയ സാങ്കേതികവിദ്യ. വിളകൾക്ക് നേരിടുന്ന കീടബാധയും രോഗങ്ങളും ചെടികൾ തന്നെ കർഷകരെ അറിയിക്കുന്ന നൂതന വിദ്യ വികസിപ്പിച്ചിരിക്കുകയാണ് കാലിഫോർണിയ ആസ്ഥാനമായുള്ള ‘ഇന്നർപ്ലാന്റ്’ എന്ന സ്റ്റാർട്ടപ്പ് കമ്പനി. ജനിതകമാറ്റം വരുത്തിയ വിളകൾ ഉപയോഗിച്ച് കാർഷിക രംഗത്ത് വലിയ കുതിച്ചുചാട്ടത്തിനാണ് ഈ സാങ്കേതികവിദ്യയിലൂടെ ലക്ഷ്യമിടുന്നത്.

ചെടികൾക്ക് രോഗം ബാധിക്കുകയോ കീടങ്ങളുടെ ആക്രമണം ഉണ്ടാകുകയോ ചെയ്താൽ പ്രകാശസൂചനകളിലൂടെയോ ഇലകളുടെ നിറം മാറ്റത്തിലൂടെയോ കർഷകർക്ക് മുന്നറിയിപ്പ് നൽകാൻ ഈ ചെടികൾക്ക് സാധിക്കും. ജനിതക എഡിറ്റിങ്, സെൻസർ സാങ്കേതികവിദ്യ എന്നിവ സംയോജിപ്പിച്ചാണ് ഇത് സാധ്യമാക്കുന്നത്. വിളകളുടെ ആരോഗ്യനില വളരെ നേരത്തേ തന്നെ കണ്ടെത്താൻ കഴിയുന്നത് വഴി വലിയ തോതിലുള്ള കൃഷിനാശം ഒഴിവാക്കാൻ സാധിക്കുമെന്ന് കമ്പനി അവകാശപ്പെടുന്നു.

പ്രശ്നം ബാധിച്ച ഭാഗങ്ങളിൽ മാത്രം കൃത്യമായി പ്രതിരോധ നടപടികൾ സ്വീകരിക്കാനും കീടനാശിനികൾ പ്രയോഗിക്കാനും ഈ സാങ്കേതികവിദ്യ സഹായിക്കും. ഇതുവഴി അമിതമായ രാസവസ്തുക്കളുടെ ഉപയോഗം കുറയ്ക്കാനും, മണ്ണും ജലസ്രോതസ്സുകളും മലിനമാകുന്നത് തടയാനും കൃഷിച്ചെലവ് കുറയ്ക്കാനും സാധിക്കും. ഉൽപ്പാദനനഷ്ടം കുറയ്ക്കുന്നതിനൊപ്പം ലഭ്യമായ വിഭവങ്ങൾ കാര്യക്ഷമമായി ഉപയോഗിക്കാനും കർഷകർക്ക് ഇത് ഗുണകരമാകുമെന്നാണ് ശാസ്ത്രജ്ഞരുടെ വിലയിരുത്തൽ.

അതേസമയം, പുതിയ കണ്ടെത്തലിൽ കർഷകർക്കിടയിൽ ആശങ്കയും നിലനിൽക്കുന്നുണ്ട്. ജനിതകമാറ്റം വരുത്തിയ ഭക്ഷ്യവിളകൾ ഭാവിയിൽ ഉണ്ടാക്കിയേക്കാവുന്ന ആരോഗ്യ, പാരിസ്ഥിതിക പ്രത്യാഘാതങ്ങളെക്കുറിച്ചാണ് പ്രധാന ആശങ്ക. കൂടാതെ, ഈ സാങ്കേതികവിദ്യ പ്രായോഗികമാക്കാൻ ഡ്രോണുകൾ, പ്രത്യേക ക്യാമറകൾ, ആധുനിക ട്രാക്ടറുകൾ തുടങ്ങിയ വിലപിടിപ്പുള്ള ഉപകരണങ്ങൾ വേണ്ടിവരുന്നത് കർഷകർക്ക് കനത്ത സാമ്പത്തിക ബാധ്യതയാകും. ഇതിന് പകരം മണ്ണിന്റെ ആരോഗ്യം മെച്ചപ്പെടുത്തുക, പ്രകാശാധിഷ്ഠിത നിരീക്ഷണ സംവിധാനങ്ങൾ ഉപയോഗിക്കുക, സംയോജിത കീടനിയന്ത്രണ രീതികൾ അവലംബിക്കുക തുടങ്ങിയ പ്രായോഗിക മാർഗ്ഗങ്ങൾ അടിയന്തരമായി നടപ്പിലാക്കണമെന്നാണ് കർഷകർ ആവശ്യപ്പെടുന്നത്.