ഹൃദയാരോഗ്യം സംരക്ഷിക്കാൻ വ്യായാമവും മരുന്നുപോലെ കുറിച്ചുനൽകണം; പുതിയ പഠന റിപ്പോർട്ട് പുറത്ത്

ഹൃദയാരോഗ്യ സംരക്ഷണത്തിനും ഹൃദ്രോഗങ്ങൾ തടയുന്നതിനും വ്യായാമവും ഒരു ചികിത്സാ രീതിയായി ഡോക്ടർമാർ കുറിച്ചുനൽകണമെന്ന് അമേരിക്കൻ കോളേജ് ഓഫ് കാർഡിയോളജിയുടെ (ACC) പുതിയ പഠന റിപ്പോർട്ട്. ജേണൽ ഓഫ് ദി അമേരിക്കൻ കോളേജ് ഓഫ് കാർഡിയോളജിയിൽ പ്രസിദ്ധീകരിച്ച ഈ പഠനത്തിൽ, ദൈനംദിന ശാരീരിക പ്രവർത്തനങ്ങൾ ഹൃദ്രോഗ സാധ്യത കുറയ്ക്കാനും, ആശുപത്രിവാസങ്ങൾ ഒഴിവാക്കാനും, മികച്ച ജീവിതനിലവാരം ഉറപ്പാക്കാനും സഹായിക്കുമെന്ന് വ്യക്തമാക്കുന്നു.

പുകവലി, ഉയർന്ന രക്തസമ്മർദ്ദം, കൊളസ്‌ട്രോൾ, പ്രമേഹം എന്നീ രോഗാവസ്ഥകളെപ്പോലെ തന്നെ ഹൃദ്രോഗ സാധ്യത വർദ്ധിപ്പിക്കുന്ന പ്രധാന ഘടകമാണ് കുറഞ്ഞ ശാരീരിക ക്ഷമതയെന്ന് (കാർഡിയോറെസ്പിറേറ്ററി ഫിറ്റ്‌നസ്) റിപ്പോർട്ട് ചൂണ്ടിക്കാട്ടുന്നു. എന്നാൽ ഇതിനായി കഠിനമായ വ്യായാമങ്ങൾ ചെയ്യണമെന്നില്ല. ദിനചര്യകളിൽ ചെറിയ മാറ്റങ്ങൾ വരുത്തി ശാരീരിക പ്രവർത്തനങ്ങൾ വർദ്ധിപ്പിക്കുന്നതിലൂടെ തന്നെ ഹൃദയാരോഗ്യത്തിൽ വലിയ മാറ്റങ്ങൾ കൊണ്ടുവരാനാകും.

ദിവസവും 10,000 ചുവടുകൾ നടക്കണമെന്നത് എല്ലാവർക്കും പ്രായോഗികമോ നിർബന്ധമോ ഉള്ള കാര്യമല്ല. മുതിർന്ന പൗരന്മാർ ഉൾപ്പെടെയുള്ളവരിൽ ദിവസവും 5,000 മുതൽ 7,000 വരെ ചുവടുകൾ നടക്കുന്നത് തന്നെ മികച്ച ആരോഗ്യ ഗുണങ്ങൾ നൽകും. ഓരോ വ്യക്തിയുടെയും ആരോഗ്യസ്ഥിതി പരിഗണിച്ച് മരുന്നുകൾ നിർദ്ദേശിക്കുന്നതുപോലെ തന്നെയാകണം വ്യായാമവും ക്രമീകരിക്കേണ്ടത്. നടത്തം, സൈക്ലിംഗ് തുടങ്ങിയ ലളിതവും ആസ്വാദ്യകരവുമായ പ്രവർത്തികൾ പതിവാക്കുന്നത് ആരോഗ്യകരമായ ജീവിതത്തിന് വഴിയൊരുക്കുമെന്നും പഠനം വിലയിരുത്തുന്നു.