‘സുപ്രീംകോടതി നിരീക്ഷണങ്ങൾ സി.പി.ഐ.എം നിലപാടുകൾക്കുള്ള അംഗീകാരം; അധികാരം പരിധി വിടരുതെന്ന് ഇ.ഡിക്ക് കോടതിയുടെ താക്കീത്’: എം.വി ഗോവിന്ദൻ

തിരുവനന്തപുരം: സി.എം.ആർ.എൽ – എക്സാലോജിക് കേസിൽ സുപ്രീംകോടതി നടത്തിയ നിരീക്ഷണങ്ങൾ സി.പി.ഐ.എം ഇതുവരെ പറഞ്ഞുകൊണ്ടിരുന്ന കാര്യങ്ങൾക്കുള്ള അംഗീകാരമാണെന്ന് സംസ്ഥാന സെക്രട്ടറി എം.വി ഗോവിന്ദൻ. നിയമവാഴ്ച ഉയർത്തിപ്പിടിക്കുന്ന ആവേശകരമായ തീരുമാനമാണ് കോടതിയുടെ ഭാഗത്തുനിന്നുണ്ടായത്. കേസിൽ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) അധികാരപരിധി വിടരുതെന്ന കൃത്യമായ സന്ദേശമാണ് കോടതി നൽകിയിരിക്കുന്നതെന്നും അദ്ദേഹം പറഞ്ഞു.

മാസപ്പടി കേസിൽ വിജിലൻസ് അന്വേഷണം തടഞ്ഞുകൊണ്ടുള്ള സുപ്രീംകോടതി വിധിക്ക് പിന്നാലെ മാധ്യമങ്ങളോട് പ്രതികരിക്കുകയായിരുന്നു അദ്ദേഹം. എഫ്.ഐ.ആർ രജിസ്റ്റർ ചെയ്യാൻ നിർദ്ദേശിച്ച ഹൈക്കോടതി സിംഗിൾ ബെഞ്ചിന്റെയും, പിണറായി വിജയന്റെ ഹർജി തള്ളിയ ഡിവിഷൻ ബെഞ്ചിന്റെയും തീരുമാനങ്ങൾ സുപ്രീംകോടതിയിൽ വിമർശിക്കപ്പെട്ടതായി എം.വി ഗോവിന്ദൻ ചൂണ്ടിക്കാട്ടി. പിണറായി വിജയനെ വേട്ടയാടാൻ കെട്ടിച്ചമച്ചതാണ് ഈ കേസ് എന്ന പാർട്ടിയുടെ മുൻ നിലപാട് ശരിവെക്കുന്നതാണ് ഇപ്പോഴത്തെ സംഭവവികാസങ്ങൾ. കേന്ദ്ര ഏജൻസികളുടെ ഇത്തരം നീക്കങ്ങളെ തുടർന്നും നിയമപരമായും രാഷ്ട്രീയമായും നേരിടുമെന്നും അദ്ദേഹം വ്യക്തമാക്കി.

കേസിൽ പ്രാഥമിക അന്വേഷണം നടത്തേണ്ടതായിരുന്നുവെന്നും, അഴിമതി നിരോധന നിയമപ്രകാരം കേസെടുക്കാൻ മുൻകൂർ അനുമതി വാങ്ങിയിട്ടില്ലെന്നും സുപ്രീംകോടതി ഇന്ന് വ്യക്തമാക്കിയിരുന്നു. ഹൈക്കോടതി അപ്പീൽ പരിഗണിക്കാത്തത് എന്തുകൊണ്ടാണെന്ന സുപ്രീംകോടതിയുടെ ചോദ്യം സി.പി.ഐ.എമ്മിന് വലിയ രാഷ്ട്രീയ ആശ്വാസമാണ് നൽകുന്നത്. വെള്ളിയാഴ്ച ചോദ്യം ചെയ്യലിന് ഹാജരാകാൻ ഇ.ഡി പിണറായി വിജയനോട് നിർദ്ദേശിച്ചിരുന്നു. അന്വേഷണ ഏജൻസികളെ ഉപയോഗിച്ചുള്ള രാഷ്ട്രീയ വേട്ടയാടലാണ് നടക്കുന്നതെന്ന പാർട്ടി വാദത്തിന് സുപ്രീംകോടതിയുടെ നിരീക്ഷണങ്ങൾ കൂടുതൽ കരുത്തുപകരുന്നതാണ്. ഇന്നത്തെ കോടതിവിധിയുടെ അടിസ്ഥാനത്തിലാകും ഇ.ഡിക്ക് മുന്നിൽ ഹാജരാകുന്ന കാര്യത്തിൽ തുടർ തീരുമാനങ്ങളെടുക്കുക.