തിരുവനന്തപുരം: കേരള രാഷ്ട്രീയത്തിലെ അതുല്യ നേതാവും മുൻ മുഖ്യമന്ത്രിയുമായ വി.എസ് അച്യുതാനന്ദന് ഇന്ന് 103-ാം ജന്മവാർഷികം. കമ്മ്യൂണിസ്റ്റ് പ്രസ്ഥാനത്തിന്റെ ജീവിക്കുന്ന ചരിത്രമായ അദ്ദേഹം, പതിറ്റാണ്ടുകൾ നീണ്ട ജനകീയ പോരാട്ടങ്ങളിലൂടെയാണ് കേരളത്തിന്റെ ‘കണ്ണും കരളുമായി’ ജനമനസ്സുകളിൽ മായാത്ത ഇടംനേടിയത്.
1923 ഒക്ടോബർ 20-ന് ആലപ്പുഴ പുന്നപ്രയിലെ വെന്തലത്തറ വീട്ടിൽ ശങ്കരന്റെയും അക്കമ്മയുടെയും മകനായാണ് ജനനം. ബാല്യത്തിൽ തന്നെ കടുത്ത ജീവിതപ്രതിസന്ധികളെ നേരിട്ടാണ് അദ്ദേഹം വളർന്നത്. നാലാം വയസ്സിൽ അമ്മയെയും പതിനൊന്നാം വയസ്സിൽ അച്ഛനെയും നഷ്ടപ്പെട്ടതോടെ ഔപചാരിക വിദ്യാഭ്യാസം ഏഴാം ക്ലാസിൽ അവസാനിപ്പിക്കേണ്ടി വന്നു. തുടർന്ന് സഹോദരന്റെ തയ്യൽക്കടയിലും പിന്നീട് കയർ ഫാക്ടറിയിലും തൊഴിലാളിയായി. സഖാവ് പി. കൃഷ്ണപിള്ളയുടെ സ്വാധീനത്താലാണ് അദ്ദേഹം കമ്മ്യൂണിസ്റ്റ് പാർട്ടിയിലേക്ക് കടന്നുവരുന്നത്.
കുട്ടനാട്ടിലെ കർഷകത്തൊഴിലാളികളെ സംഘടിപ്പിച്ച് രാഷ്ട്രീയരംഗത്ത് സജീവമായ അദ്ദേഹം 17-ാം വയസ്സിൽ പാർട്ടി അംഗത്വം നേടി. പുന്നപ്ര-വയലാർ സമരത്തിന്റെ മുന്നണിപ്പോരാളിയായി നിന്ന വി.എസ് കൊടിയ പൊലീസ് മർദ്ദനങ്ങൾ ഏറ്റുവാങ്ങിയിട്ടുണ്ട്. 1980 മുതൽ 1992 വരെ നീണ്ട 12 വർഷക്കാലം സി.പി.ഐ.എം സംസ്ഥാന സെക്രട്ടറിയായും അദ്ദേഹം പ്രവർത്തിച്ചു.
1996-ൽ മാരാരിക്കുളത്തുണ്ടായ തിരഞ്ഞെടുപ്പ് പരാജയത്തിന് ശേഷം പ്രതിപക്ഷ നേതാവായി മാറിയ വി.എസ്, കേരളം കണ്ട ഏറ്റവും വലിയ ജനകീയ നേതാവായി വളരുന്നതിനാണ് പിന്നീട് ചരിത്രം സാക്ഷ്യംവഹിച്ചത്. മതികെട്ടാൻ മല, പ്ലാച്ചിമട, മൂന്നാർ, എൻഡോസൾഫാൻ, സൂര്യനെല്ലി തുടങ്ങിയ ജനകീയ വിഷയങ്ങൾ ഏറ്റെടുത്ത് അദ്ദേഹം നടത്തിയ പോരാട്ടങ്ങൾ വലിയ രാഷ്ട്രീയ മാറ്റങ്ങൾക്ക് വഴിവെച്ചു. ജനകീയ പിന്തുണയുടെ കരുത്തിൽ, മത്സരിക്കാൻ സീറ്റ് നിഷേധിച്ച പാർട്ടിക്ക് നിലപാട് തിരുത്തേണ്ടി വന്ന ചരിത്രവും വി.എസിന്റെ പേരിലുണ്ട്. തുടർന്ന് 83-ാം വയസ്സിൽ അദ്ദേഹം കേരളത്തിന്റെ മുഖ്യമന്ത്രിയായി അധികാരമേറ്റു. സാധാരണക്കാരുടെ ആശ്രയവും അഴിമതിക്കെതിരായ വിട്ടുവീഴ്ചയില്ലാത്ത പോരാളിയുമായിരുന്ന വി.എസിന്റെ ജന്മദിനത്തിൽ ആവേശത്തോടെയാണ് കേരളം ആ സ്മരണകൾ പുതുക്കുന്നത്.
+ There are no comments
Add yours