ന്യൂഡൽഹി: ട്രെയിൻ യാത്രക്കാരുടെ സുരക്ഷ ഉറപ്പാക്കുന്നതിന്റെ ഭാഗമായി, സ്റ്റേഷൻ കൗണ്ടറുകൾ വഴി എടുക്കുന്ന ടിക്കറ്റുകൾക്കും ഇൻഷുറൻസ് പരിരക്ഷ നൽകണമെന്ന് റെയിൽവേയ്ക്ക് സുപ്രീംകോടതിയുടെ കർശന നിർദ്ദേശം. ഒക്ടോബർ 27 മുതലാണ് ഈ സുപ്രധാന മാറ്റം പ്രാബല്യത്തിൽ വരിക. ഉത്തരവ് നടപ്പിലാക്കുന്നതിൽ വീഴ്ചവരുത്തിയാൽ റെയിൽവേ ബോർഡായിരിക്കും പൂർണ്ണ ഉത്തരവാദിയെന്ന് ജസ്റ്റിസുമാരായ അഹ്സാനുദ്ദീൻ അമാനുല്ല, ആർ. മഹാദേവൻ എന്നിവരടങ്ങിയ ബെഞ്ച് മുന്നറിയിപ്പ് നൽകി.
നിലവിൽ ഐ.ആർ.സി.ടി.സി (IRCTC) മുഖേന ഓൺലൈനായി ഇ-ടിക്കറ്റുകൾ ബുക്ക് ചെയ്യുന്ന യാത്രക്കാർക്ക് മാത്രമാണ് യാത്രാ ഇൻഷുറൻസ് ലഭ്യമായിരുന്നത്. ബുക്കിംഗ് സമയത്ത് തന്നെ യാത്രക്കാർക്ക് ഈ ഓപ്ഷൻ തിരഞ്ഞെടുക്കാം. 2024 ഫെബ്രുവരി 17 മുതൽ ഒരു യാത്രക്കാരന് നികുതി ഉൾപ്പെടെ 0.45 രൂപയാണ് ഓൺലൈൻ ഇൻഷുറൻസ് പ്രീമിയമായി ഈടാക്കുന്നത്.
എന്നാൽ, കൗണ്ടറുകളിൽ നിന്ന് ടിക്കറ്റ് എടുക്കുന്നവർക്കുള്ള ഇൻഷുറൻസ് പരിരക്ഷയുടെ പ്രീമിയം തുകയോ മറ്റ് വിവരങ്ങളോ റെയിൽവേ ഇതുവരെ ഔദ്യോഗികമായി പുറത്തുവിട്ടിട്ടില്ല. അതിനാൽ, ഒക്ടോബർ 27-ന് ശേഷം കൗണ്ടറുകളിൽ നിന്ന് ടിക്കറ്റെടുക്കുന്ന യാത്രക്കാർ പ്രീമിയം തുക, ആവശ്യമായ രേഖകൾ, ക്ലെയിം നടപടിക്രമങ്ങൾ എന്നിവ സംബന്ധിച്ച് റെയിൽവേ പുറത്തിറക്കുന്ന ഏറ്റവും പുതിയ മാർഗ്ഗനിർദ്ദേശങ്ങൾ പരിശോധിക്കേണ്ടതാണ്.
+ There are no comments
Add yours