‘വാരണാസി’യിലെ സ്വന്തം ‘കുംഭ’യ്ക്ക് ആശംസകൾ; നിഗൂഢതയും കരുത്തും ഒത്തുചേർന്ന വ്യക്തിത്വമെന്ന് പൃഥ്വിരാജിനെക്കുറിച്ച് എസ്.എസ്. രാജമൗലി

മലയാളികളുടെ പ്രിയതാരം പൃഥ്വിരാജ് സുകുമാരന് 44-ാം ജന്മദിനത്തിൽ ആശംസകളുമായി പ്രമുഖ സംവിധായകൻ എസ്.എസ്. രാജമൗലി. തന്റെ പുതിയ ബ്രഹ്മാണ്ഡ ചിത്രമായ ‘വാരണാസി’യിലെ പൃഥ്വിരാജിന്റെ ലൊക്കേഷൻ ചിത്രങ്ങൾ പങ്കുവെച്ചുകൊണ്ടാണ് അദ്ദേഹം ആശംസകൾ നേർന്നത്. ചിത്രത്തിൽ ‘കുംഭ’ എന്ന സുപ്രധാന കേന്ദ്രകഥാപാത്രത്തെയാണ് പൃഥ്വി അവതരിപ്പിക്കുന്നത്.

“വാരണാസി ടീമിന്റെ സ്വന്തം കുംഭയ്ക്ക് ഹൃദയം നിറഞ്ഞ ജന്മദിനാശംസകൾ! അനന്തമായ സാധ്യതകളുള്ള ലോകത്തെ പ്രവചനാതീതമായ സാന്നിധ്യമാണ് അദ്ദേഹം. നിഗൂഢതയും കരുത്തും അതിരുകളില്ലാത്ത കഴിവും ഒത്തുചേരുന്ന അപൂർവ വ്യക്തിത്വം. ജന്മദിനാശംസകൾ പ്രിയപ്പെട്ട പൃഥ്വിരാജ് സുകുമാരൻ,” രാജമൗലി സോഷ്യൽ മീഡിയയിൽ കുറിച്ചു. ലോക സിനിമ ഏറെ പ്രതീക്ഷയോടെ കാത്തിരിക്കുന്ന ചിത്രത്തിലെ പൃഥ്വിരാജിന്റെ കഥാപാത്രത്തെക്കുറിച്ചുള്ള ഈ വിവരണം ആരാധകർക്കിടയിൽ ആവേശമായിട്ടുണ്ട്.

മഹേഷ് ബാബു, പ്രിയങ്ക ചോപ്ര തുടങ്ങിയ വമ്പൻ താരനിരയാണ് വാരണാസിയിൽ അണിനിരക്കുന്നത്. എം.എം. കീരവാണിയാണ് ചിത്രത്തിന് സംഗീതം ഒരുക്കുന്നത്. ശ്രീ ദുർഗ ആർട്സും ഷോയിങ് ബിസിനസും സംയുക്തമായി നിർമ്മിക്കുന്ന ഈ ചിത്രം 2027 ഏപ്രിൽ 7-ന് ലോകവ്യാപകമായി തിയേറ്ററുകളിലെത്തും.