ആരോഗ്യകാര്യങ്ങൾ ട്രാക്ക് ചെയ്യാൻ സ്മാർട്ട് വാച്ചുകളെ ആശ്രയിച്ചിരുന്നവർക്കിടയിൽ ഇപ്പോൾ പുതിയ ട്രെൻഡായി മാറിയിരിക്കുകയാണ് ഫിറ്റ്നസ് റിങ്ങുകൾ അഥവാ സ്മാർട്ട് റിങ്ങുകൾ. ഉറക്കത്തിന്റെ ദൈർഘ്യം, ശാരീരിക പ്രവർത്തനങ്ങൾ, ഹൃദയമിടിപ്പിലെ വ്യതിയാനങ്ങൾ, രക്തത്തിലെ ഓക്സിജന്റെ അളവ് (SpO2) തുടങ്ങി ഇ.സി.ജി റെക്കോർഡ് ചെയ്യാൻ വരെ ഇത്തരം റിങ്ങുകളിലൂടെ സാധിക്കും. 24 മണിക്കൂറും വിരലിൽ അണിയാമെന്നതിനാൽ കൂടുതൽ കൃത്യതയോടെ ആരോഗ്യവിവരങ്ങൾ ശേഖരിക്കാനും ഇതിലൂടെ സാധിക്കുന്നുണ്ട്.
ഓഫീസ് ജോലികൾക്കിടയിലെ ശാരീരിക അധ്വാനം, ദൂരയാത്രകൾ, ക്രമരഹിതമായ ഉറക്കം എന്നിവ മനസ്സിലാക്കി കൃത്യമായ ഫിറ്റ്നസ് ഗോളുകൾ സെറ്റ് ചെയ്യാൻ ഇത് ഉപകാരപ്രദമാണ്. എന്നാൽ ഇത്തരം ഉപകരണങ്ങൾ നൽകുന്ന വിവരങ്ങൾ ഒരിക്കലും ഒരു മെഡിക്കൽ പരിശോധനയ്ക്കോ രോഗനിർണ്ണയത്തിനോ പകരമാകില്ലെന്ന് ആരോഗ്യ വിദഗ്ധർ മുന്നറിയിപ്പ് നൽകുന്നു. ഉയർന്ന അളവിലുള്ള ഹെൽത്ത് ഡാറ്റ ലഭിച്ചതുകൊണ്ട് മാത്രം മെച്ചപ്പെട്ട ആരോഗ്യം ഉറപ്പാക്കാൻ കഴിയില്ല.
ഫിറ്റ്നസ് റിങ്ങുകൾ നൽകുന്ന റീഡിങ്ങുകൾ കൃത്യമായി വിലയിരുത്തുമ്പോൾ മാത്രമാണ് അവ ഉപയോഗപ്രദമാകുന്നതെന്ന് മാക്‌സ് ഹോസ്പിറ്റലിലെ കാർഡിയോളജിസ്റ്റും പാൻ മാക്‌സിലെ കാർഡിയാക് സയൻസസ് ഗ്രൂപ്പ് ചെയർമാനുമായ ഡോ. ബൽബീർ സിങ് വ്യക്തമാക്കുന്നു. ഇതിന് പുറമെ, ഇത്തരം ഗാഡ്‌ജെറ്റുകളെ അമിതമായി ആശ്രയിക്കുന്നതിനെതിരെ ലക്ഷ്യ സ്‌ട്രെങ്ത് ആൻഡ് കണ്ടീഷനിങ് സ്ഥാപകനായ കൈലാഷ് മേനോനും മുന്നറിയിപ്പ് നൽകുന്നുണ്ട്. ട്രാക്കിങ് സംവിധാനങ്ങൾ ഉപയോഗിക്കുന്നതിലൂടെ മാത്രം ഫിറ്റ്നസ് മെച്ചപ്പെടില്ലെന്നും, ലഭിക്കുന്ന വിവരങ്ങൾ വെച്ച് നാം എന്തുചെയ്യുന്നു എന്നതാണ് പ്രധാനമെന്നും അദ്ദേഹം ചൂണ്ടിക്കാട്ടുന്നു. ഹെൽത്ത് ട്രാക്കറുകളെ അമിതമായി ആശ്രയിക്കുന്നത് ശരീരത്തെക്കുറിച്ചുള്ള ആളുകളുടെ സ്വാഭാവികമായ തിരിച്ചറിവുകളെ ഇല്ലാതാക്കും. അതിനാൽ സ്മാർട്ട് റിങ്ങുകളിലെ റീഡിങ്ങുകളിൽ അസ്വാഭാവികത തോന്നുന്നവർ സ്വയം നിഗമനങ്ങളിലെത്താതെ കൃത്യമായി ഡോക്ടറെ സമീപിക്കുന്നതാണ് സുരക്ഷിതം.
+ There are no comments
Add yours