ബാങ്ക് വായ്പകൾക്കും ക്രെഡിറ്റ് കാർഡുകൾക്കും അപേക്ഷിക്കുമ്പോൾ സിബിൽ (CIBIL) സ്കോർ എത്രത്തോളം നിർണായകമാണെന്ന് എല്ലാവർക്കുമറിയാം. വായ്പാ തിരിച്ചടവുകളും ക്രെഡിറ്റ് കാർഡ് ഉപയോഗവും സ്കോറിനെ സ്വാധീനിക്കുമെന്ന് അറിയാമെങ്കിലും, മൊബൈൽ ബില്ലുകൾ മുടങ്ങുന്നതും നിങ്ങളുടെ സിബിൽ സ്കോറിനെ പ്രതികൂലമായി ബാധിച്ചേക്കാമെന്നത് പലർക്കും പുതിയ അറിവായിരിക്കും.
കൃത്യസമയത്ത് മൊബൈൽ ബിൽ അടയ്ക്കുന്നത് സിബിൽ സ്കോർ വർദ്ധിപ്പിക്കാൻ സഹായിക്കില്ലെങ്കിലും, ബിൽ അടവ് മുടങ്ങുന്നത് സ്കോർ കുറയാൻ കാരണമാകും. പ്രത്യേകിച്ച് പോസ്റ്റ്പെയ്ഡ് കണക്ഷനുകളിൽ, കുടിശ്ശികയുള്ള തുക മൊബൈൽ സേവന ദാതാക്കൾ കളക്ഷൻ ഏജൻസികൾക്ക് കൈമാറുന്ന സാഹചര്യമുണ്ടായാൽ അത് നിങ്ങളുടെ ക്രെഡിറ്റ് റിപ്പോർട്ടിൽ പ്രതിഫലിക്കും. ഇത് നിങ്ങളെ ഒരു ‘റിസ്ക് ഉള്ള ഉപഭോക്താവായി’ ചിത്രീകരിക്കാനും ഭാവിയിൽ ബാങ്ക് വായ്പകളോ ക്രെഡിറ്റ് കാർഡുകളോ ലഭിക്കുന്നത് തടസ്സപ്പെടാനും കാരണമാകും. ഒരിക്കൽ റിപ്പോർട്ട് ചെയ്യപ്പെട്ടാൽ ഈ വിവരങ്ങൾ വർഷങ്ങളോളം ക്രെഡിറ്റ് റിപ്പോർട്ടിൽ തുടർന്നേക്കാം. അതിനാൽ ബാങ്ക് വായ്പകൾ തിരിച്ചടയ്ക്കുന്ന അതേ പ്രാധാന്യത്തോടെ തന്നെ മൊബൈൽ ബില്ലുകളും കൈകാര്യം ചെയ്യേണ്ടതുണ്ട്.
നിലവിൽ ഇന്ത്യയിലെ ക്രെഡിറ്റ് ഇൻഫർമേഷൻ ഏജൻസികൾ വായ്പാ തിരിച്ചടവുകൾ, ക്രെഡിറ്റ് കാർഡ് ബില്ലുകൾ തുടങ്ങിയവയെ അടിസ്ഥാനമാക്കിയാണ് പ്രധാനമായും സിബിൽ സ്കോർ കണക്കാക്കുന്നത്. മൊബൈൽ ബിൽ ഉൾപ്പെടെയുള്ള യൂട്ടിലിറ്റി ബില്ലുകൾ ഇതിനായി ഉപയോഗിക്കാറില്ല. എന്നാൽ മുൻകാല വായ്പാ ചരിത്രമില്ലാത്ത വ്യക്തികൾക്കും ക്രെഡിറ്റ് സ്കോർ നിർമ്മിക്കുന്നതിനായി, യൂട്ടിലിറ്റി ബില്ലുകൾ കൂടി ഉൾപ്പെടുത്തിയുള്ള പുതിയ ക്രെഡിറ്റ് സ്കോറിംഗ് രീതികൾ ആഗോളതലത്തിൽ വികസിപ്പിച്ചുവരുന്നുണ്ട്. ചില വിദേശ രാജ്യങ്ങളിൽ ഇത്തരം രീതികൾ നിലവിലുണ്ടെങ്കിലും ഇന്ത്യയിലെ ധനകാര്യ സ്ഥാപനങ്ങൾ ഈ സംവിധാനം വ്യാപകമായി സ്വീകരിച്ചു തുടങ്ങിയിട്ടില്ല.
+ There are no comments
Add yours