സംസ്ഥാന സർക്കാർ പുറത്തുവിട്ട പരിസ്ഥിതിലോല പ്രദേശങ്ങളുടെ (ഇ.എസ്.ഇസഡ്) മാപ്പിലെ അവ്യക്തതകൾക്കെതിരെ മലയോര മേഖലകളിൽ പ്രതിഷേധം ശക്തമാകുന്നു. പട്ടികയിലുള്ള എട്ടു വില്ലേജുകൾ ഏതൊക്കെയെന്ന് തിരിച്ചറിയാൻ കഴിയാത്ത വിധത്തിലുള്ള ആശയക്കുഴപ്പമാണ് നിലനിൽക്കുന്നത്. കേന്ദ്ര-സംസ്ഥാന സർക്കാരുകളുടെ അശാസ്ത്രീയമായ ഈ നടപടികളിൽ പ്രതിഷേധിച്ച് ഒക്ടോബർ 27-ന് കൊല്ലം ജില്ലയിൽ ഹർത്താലിന് ആഹ്വാനം ചെയ്തിരിക്കുകയാണ്.
വില്ലേജ് അടിസ്ഥാനത്തിലുള്ള വ്യക്തമായ മാപ്പ് പ്രസിദ്ധീകരിക്കണമെന്നാണ് നാട്ടുകാരുടെ പ്രധാന ആവശ്യം. പരിസ്ഥിതിലോല മേഖലയിൽ നിന്ന് ഒഴിവാക്കണമെന്ന് ആവശ്യപ്പെട്ട പ്രദേശങ്ങളുടെ പട്ടികയിൽ കൊല്ലം ജില്ലയെ ഉൾപ്പെടുത്തിയിട്ടില്ലെന്നും ആക്ഷേപമുണ്ട്. 79,603 ഹെക്ടർ ഭൂമി കൂടി ബഫർ സോൺ പരിധിയിലാകുന്നതോടെ അരലക്ഷത്തോളം കർഷകരാണ് വലിയ പ്രതിസന്ധിയിലാകുന്നതെന്ന് സമരസമിതി ചൂണ്ടിക്കാട്ടുന്നു.
സംസ്ഥാനത്തെ 33 വില്ലേജുകളിലായി 8596.69 ചതുരശ്ര കിലോമീറ്റർ പ്രദേശം പരിസ്ഥിതിലോല മേഖലയായി കണക്കാക്കിയുള്ള വിവരങ്ങൾ കഴിഞ്ഞ ദിവസമാണ് പരിസ്ഥിതി ഡയറക്ടറേറ്റിന്റെ വെബ്സൈറ്റിൽ പ്രസിദ്ധീകരിച്ചത്. എന്നാൽ, തങ്ങളുടെ സ്ഥലങ്ങൾ ഉൾപ്പെട്ടിട്ടുണ്ടോ എന്നറിയാനുള്ള ജനങ്ങളുടെ ആശങ്കകൾ അകറ്റാൻ പര്യാപ്തമായ വിവരങ്ങളൊന്നും ഈ വെബ്സൈറ്റിലോ മാപ്പിലോ ലഭ്യമല്ലെന്നാണ് പ്രധാന പരാതി.
+ There are no comments
Add yours