ഡാറ്റാ സെന്റർ ഹാർഡ്‌വെയർ നിർമ്മാണം: യു.എസ് കമ്പനിയായ ജാബിലുമായി കൈകോർത്ത് അദാനി ഗ്രൂപ്പ്

ഇന്ത്യയിലെ അതിവേഗം വളരുന്ന ആർട്ടിഫിഷ്യൽ ഇന്റലിജൻസ് (എ.ഐ), ഡാറ്റാ സെന്റർ ആവശ്യങ്ങൾക്കായി ഹാർഡ്‌വെയർ ഉപകരണങ്ങൾ നിർമ്മിക്കാൻ അദാനി എന്റർപ്രൈസസ് ആഗോള എഞ്ചിനീയറിംഗ് കമ്പനിയായ ‘ജാബിൽ ഇൻകോർപ്പറേറ്റഡുമായി’ (Jabil Inc) ധാരണാപത്രത്തിൽ ഒപ്പുവെച്ചു. 50:50 അനുപാതത്തിലുള്ള ഈ സംയുക്ത സംരംഭത്തിലൂടെ എ.ഐ റാക്കുകൾ, സെർവറുകൾ, നെറ്റ്‌വർക്കിംഗ് സംവിധാനങ്ങൾ, കൂളിംഗ്-പവർ സാങ്കേതികവിദ്യകൾ എന്നിവ രാജ്യത്ത് തന്നെ നിർമ്മിച്ച് അസംബിൾ ചെയ്യാനാണ് ലക്ഷ്യമിടുന്നത്. 2026 ജൂണിൽ ഇരു കമ്പനികളും പ്രഖ്യാപിച്ച തന്ത്രപ്രധാന സഹകരണത്തിന്റെ തുടർച്ചയായാണ് ഈ പുതിയ കരാർ.

2030-ഓടെ ഇന്ത്യയുടെ ഡാറ്റാ സെന്റർ ശേഷി 5 മുതൽ 8 ഗിഗാവാട്ട് വരെയായി ഉയരുമെന്നാണ് വിലയിരുത്തൽ. കൂടാതെ, ഡാറ്റാ സെന്റർ, ക്ലൗഡ്, എ.ഐ മേഖലകളിലായി 50 ബില്യൺ ഡോളറിലധികം നിക്ഷേപവും പ്രതീക്ഷിക്കുന്നുണ്ട്. അടുത്ത ഏഴ് വർഷത്തിനുള്ളിൽ 3 ട്രില്യൺ ഡോളറിലധികം മൂല്യം വരുന്ന ആഗോള എ.ഐ കമ്പ്യൂട്ടിംഗ് വിപണിയിൽ വലിയൊരു പങ്കാളിത്തം ഉറപ്പാക്കുകയാണ് അദാനി-ജാബിൽ സഖ്യത്തിന്റെ പ്രധാന ലക്ഷ്യം.

ഹൈപ്പർസ്കേലറുകൾ, നിയോക്ലൗഡുകൾ, ഡാറ്റാ സെന്റർ ഓപ്പറേറ്റർമാർ എന്നിവർക്കായി ‘മെയ്ഡ് ഇൻ ഇന്ത്യ’ ഉൽപ്പന്നങ്ങൾ ലഭ്യമാക്കാൻ ഈ കൂട്ടുകെട്ടിലൂടെ സാധിക്കും. കേവലം അടിസ്ഥാനസൗകര്യങ്ങൾ ഒരുക്കുന്നതിൽ നിന്ന് മാറി എ.ഐ കമ്പ്യൂട്ടിംഗിന് ആവശ്യമായ സിസ്റ്റങ്ങൾ നേരിട്ട് നിർമ്മിക്കുന്നതിലേക്കുള്ള അദാനി ഗ്രൂപ്പിന്റെ നിർണായക ചുവടുവെപ്പാണിതെന്ന് ഗൗതം അദാനി വ്യക്തമാക്കി. ബന്ധപ്പെട്ട അധികാരികളുടെ അംഗീകാരങ്ങൾക്കും അന്തിമ കരാറുകൾ ഒപ്പിടുന്നതിനും വിധേയമായിട്ടായിരിക്കും സംരംഭത്തിന്റെ തുടർപ്രവർത്തനങ്ങൾ.