‘കേരളത്തിന്റെ ആരോഗ്യരംഗം രാജ്യത്തിന്റെ പ്രകാശഗോപുരം; ആ വിളക്ക് കെടുത്താതിരുന്നാൽ മതി’: സർക്കാരിനെതിരെ പിണറായി വിജയൻ

തിരുവനന്തപുരം: സംസ്ഥാനത്തെ മരുന്ന് ക്ഷാമത്തിൽ സർക്കാരിനെതിരെ രൂക്ഷവിമർശനവുമായി പ്രതിപക്ഷ നേതാവ് പിണറായി വിജയൻ. കേരളത്തിന്റെ ആരോഗ്യരംഗം രാജ്യത്തിന്റെ പ്രകാശഗോപുരമാണെന്നും ആ വിളക്ക് കെടുത്താതിരുന്നാൽ മതിയെന്നും, അല്ലാതെ വേറെ അത്ഭുതവിളക്കൊന്നും തേടി പോകേണ്ട കാര്യമില്ലെന്നും അദ്ദേഹം നിയമസഭയിൽ പറഞ്ഞു.

ആരോഗ്യരംഗത്തെ പ്രശ്നങ്ങൾ പരിഹരിക്കാൻ തന്റെ കയ്യിൽ അലാവുദ്ദീന്റെ അത്ഭുതവിളക്കില്ലെന്ന ആരോഗ്യ മന്ത്രിയുടെ പരാമർശത്തിന് മറുപടി നൽകുകയായിരുന്നു പ്രതിപക്ഷ നേതാവ്. മരുന്നുകൾക്ക് ക്ഷാമമില്ലെന്നും ചില മരുന്നുകൾ മാത്രമാണ് കുറവുള്ളതെന്നുമുള്ള മന്ത്രിയുടെ വാദം വിചിത്രമാണ്. മരുന്നുകളുടെ കുറവിനെ തന്നെയാണ് ക്ഷാമമെന്ന് വിളിക്കുന്നതെന്ന് മന്ത്രി മനസ്സിലാക്കണം. സർക്കാരിന്റെ പിടിപ്പുകേടും ആത്മാർത്ഥതയില്ലാത്ത സമീപനങ്ങളുമാണ് ഇപ്പോഴത്തെ പ്രതിസന്ധികൾക്ക് കാരണം. മണിക്കൂറുകളോളം വരിനിൽക്കേണ്ടി വന്നിട്ടും മരുന്ന് ലഭിക്കാതെ ജനങ്ങൾ മടങ്ങുന്ന അവസ്ഥയാണുള്ളത്. അട്ടപ്പാടിയിലെ ശിശുമരണങ്ങൾക്ക് ഉത്തരവാദി ആരാണെന്ന് സർക്കാർ വ്യക്തമാക്കണമെന്നും അദ്ദേഹം ആവശ്യപ്പെട്ടു.

ആരോഗ്യ മേഖലയിലെ പ്രതിസന്ധി ചൂണ്ടിക്കാട്ടി പ്രതിപക്ഷം കൊണ്ടുവന്ന അടിയന്തര പ്രമേയ നോട്ടീസിനിടെയാണ് സഭയിൽ ഭരണ-പ്രതിപക്ഷ വാക്പോരുണ്ടായത്. സംസ്ഥാനത്ത് മരുന്ന് സ്റ്റോക്കില്ലെന്ന കെ.വി സുമേഷ് എം.എൽ.എയുടെ വിമർശനത്തിന് ആരോഗ്യമന്ത്രി കെ. മുരളീധരൻ നൽകിയ മറുപടിയാണ് ബഹളത്തിനിടയാക്കിയത്. അധികാരം നഷ്ടപ്പെട്ട സങ്കടം മാറ്റാനുള്ള മരുന്ന് മാത്രമേ ഇപ്പോൾ സ്റ്റോക്കില്ലാത്തതുള്ളൂ എന്നായിരുന്നു മന്ത്രിയുടെ പരിഹാസം. കഴിഞ്ഞ സർക്കാർ മാർച്ച് മാസത്തിൽ പർച്ചേസ് ഓർഡർ നൽകുന്നതിൽ വരുത്തിയ വീഴ്ചയാണ് നിലവിലെ പ്രതിസന്ധിക്ക് കാരണമെന്നും മന്ത്രി സഭയിൽ കുറ്റപ്പെടുത്തി.