തിരുവനന്തപുരം: തലസ്ഥാനത്ത് നടന്ന സംഘർഷത്തിൽ വിദ്യാർത്ഥികളെ മർദ്ദിച്ച പോലീസ് ഉദ്യോഗസ്ഥർക്കെതിരെ കർശന നടപടി ആവശ്യപ്പെട്ട് എസ്.എഫ്.ഐ നേതൃത്വം ആഭ്യന്തരമന്ത്രിക്ക് പരാതി നൽകി. കിംസ് ആശുപത്രിയിൽ ചികിത്സയിൽ കഴിയുന്ന ആഭ്യന്തരമന്ത്രി രമേശ് ചെന്നിത്തലയെ നേരിട്ടെത്തിയാണ് നേതാക്കൾ പരാതി കൈമാറിയത്. മുൻ മന്ത്രി വി. ശിവൻകുട്ടിയും എസ്.എഫ്.ഐ നേതാക്കൾക്കൊപ്പമുണ്ടായിരുന്നു.
കഴിഞ്ഞ ദിവസമുണ്ടായ സംഘർഷങ്ങളുടെ പശ്ചാത്തലത്തിൽ സംസ്ഥാനത്തുടനീളം പ്രതിഷേധം ശക്തമാക്കാനാണ് ഇടത് യുവജന സംഘടനകളുടെ തീരുമാനം. ഇതിന്റെ ഭാഗമായി യൂത്ത് കോൺഗ്രസ് അധ്യക്ഷനും മന്ത്രിയുമായ ഒ.ജെ. ജനീഷിനെതിരെ വാഹനം തടയലും കരിങ്കൊടി കാണിക്കലുമടക്കമുള്ള പ്രതിഷേധങ്ങൾ സംഘടിപ്പിക്കുമെന്ന് എസ്.എഫ്.ഐ പ്രഖ്യാപിച്ചു. ഇതേത്തുടർന്ന് മന്ത്രിക്ക് പോലീസ് സുരക്ഷ വർധിപ്പിച്ചിട്ടുണ്ട്. കരിങ്കൊടി പ്രതിഷേധങ്ങളെ സ്വാഗതം ചെയ്യുന്നുണ്ടെങ്കിലും അക്രമസംഭവങ്ങൾ വെച്ചുപൊറുപ്പിക്കില്ലെന്ന് മന്ത്രി കെ. മുരളീധരൻ മുന്നറിയിപ്പ് നൽകി. അതേസമയം, യുവമോർച്ച ഒരു സമരസംഘടനയാണെന്നും ചുറുചുറുക്കുള്ള യുവാക്കൾ സമരം ചെയ്യട്ടെയെന്നും ബി.ജെ.പി നേതാവും തിരുവനന്തപുരം മേയറുമായ വി.വി. രാജേഷ് പ്രതികരിച്ചു.
ഇതിനിടെ വിവിധയിടങ്ങളിൽ അക്രമസംഭവങ്ങളും റിപ്പോർട്ട് ചെയ്യപ്പെട്ടു. കൊല്ലം അഞ്ചാലുംമൂട്ടിൽ കോൺഗ്രസ് കമ്മിറ്റി ഓഫീസ് ആക്രമിച്ച സംഭവത്തിൽ എസ്.എഫ്.ഐ, ഡി.വൈ.എഫ്.ഐ പ്രവർത്തകരെ പോലീസ് പ്രതിചേർത്തിട്ടുണ്ട്. കണ്ണൂർ കൂത്തുപറമ്പിലും കോൺഗ്രസ് ഓഫീസിന് നേരെ ആക്രമണമുണ്ടായി. തിരുവനന്തപുരത്തെ സംഘർഷവുമായി ബന്ധപ്പെട്ട് ഒരു യൂത്ത് കോൺഗ്രസ് പ്രവർത്തകൻ പിടിയിലായി. സംഭവങ്ങളിൽ കേസെടുത്ത പോലീസ് തുടർ നിയമനടപടികൾ വേഗത്തിലാക്കിയിരിക്കുകയാണ്.
+ There are no comments
Add yours