‘മുന്നണിയിൽ കൃത്യമായ ചർച്ചകളുണ്ട്’; അടൂർ പ്രകാശിന്റെ വിമർശനങ്ങളെ തള്ളി മുസ്ലിം ലീഗ്, ഒറ്റക്കെട്ടായി നിൽക്കേണ്ട സമയമെന്ന് കുഞ്ഞാലിക്കുട്ടി

മലപ്പുറം: സർക്കാരിന്റെയും മുന്നണിയുടെയും തീരുമാനങ്ങളിൽ യാതൊരു കൂടിയാലോചനകളുമില്ലെന്ന യു.ഡി.എഫ് കൺവീനർ അടൂർ പ്രകാശിന്റെ പരസ്യവിമർശനങ്ങളെ തള്ളി ഘടകകക്ഷിയായ മുസ്ലിം ലീഗ് രംഗത്ത്. യു.ഡി.എഫിൽ കൃത്യമായ ചർച്ചകൾ നടക്കുന്നുണ്ടെന്നും പ്രധാന തീരുമാനങ്ങളെല്ലാം ഉഭയകക്ഷി ചർച്ചകളിലൂടെ തന്നെയാണ് എടുക്കുന്നതെന്നും മന്ത്രി പി.കെ. കുഞ്ഞാലിക്കുട്ടിയും ലീഗ് സംസ്ഥാന അധ്യക്ഷൻ സാദിഖലി ശിഹാബ് തങ്ങളും വ്യക്തമാക്കി. എം.കെ. മുനീറിന്റെ നിയമനമടക്കമുള്ള കാര്യങ്ങൾ ഇത്തരം ചർച്ചകളിലൂടെയാണ് തീരുമാനിച്ചതെന്നും, ലീഗിൽ ആഭ്യന്തര കലഹങ്ങളില്ലെന്നും സാദിഖലി തങ്ങൾ പറഞ്ഞു.

മുന്നണിയിൽ യാതൊരുവിധ അനൈക്യവുമില്ലെന്നും ഇനിയും ചില തീരുമാനങ്ങൾ വരാനുണ്ടെന്നും അതോടെ എല്ലാവരുടെയും പരാതികൾ അവസാനിക്കുമെന്നും പി.കെ. കുഞ്ഞാലിക്കുട്ടി പറഞ്ഞു. തിരഞ്ഞെടുപ്പ് കമ്മീഷനുമായി ബന്ധപ്പെട്ട വിഷയത്തിന്റെ പ്രാധാന്യം ഇത്തരം വിവാദങ്ങളിലൂടെ ഇല്ലാതാക്കരുത്. രാജ്യം മുഴുവൻ ഒറ്റക്കെട്ടായി നിൽക്കേണ്ട സമയത്ത് ഇതിനിടയിൽ ഇത്തരം പ്രശ്നങ്ങൾ ഉണ്ടാകാൻ പാടില്ലായിരുന്നുവെന്നും അദ്ദേഹം കൂട്ടിച്ചേർത്തു.

അതേസമയം, അടൂർ പ്രകാശിന്റെ അതൃപ്തി പ്രകടനത്തോടെ കോൺഗ്രസിനുള്ളിൽ നേതാക്കൾ തമ്മിലുള്ള വാക്പോര് രൂക്ഷമാകുകയാണ്. സ്പീക്കർ തിരുവഞ്ചൂർ രാധാകൃഷ്ണനും കെ.പി.സി.സി ജനറൽ സെക്രട്ടറി ദീപ്തി മേരി വർഗീസും അടൂർ പ്രകാശിന് പരോക്ഷ പിന്തുണയുമായി രംഗത്തെത്തിയപ്പോൾ, മാധ്യമങ്ങളിലൂടെയല്ല പാർട്ടി വേദിയിലാണ് കാര്യങ്ങൾ പറയേണ്ടതെന്ന നിലപാടെടുത്ത് മന്ത്രി കെ. മുരളീധരൻ കൺവീനറെ പൂർണ്ണമായും തള്ളിക്കളഞ്ഞു.