‘അടൂർ പ്രകാശ് പറഞ്ഞ കാര്യങ്ങൾ തള്ളിക്കളയാനാകില്ല’; പിന്തുണയുമായി ജെബി മേത്തർ, കെ.പി.സി.സി നിർവാഹകസമിതി വിളിക്കണമെന്ന് മഹിളാ കോൺഗ്രസ്

തിരുവനന്തപുരം: യു.ഡി.എഫ് കൺവീനർ അടൂർ പ്രകാശ് ഉന്നയിച്ച വിമർശനങ്ങൾ തള്ളിക്കളയാൻ കഴിയുന്നതല്ലെന്ന് മഹിളാ കോൺഗ്രസ് സംസ്ഥാന അധ്യക്ഷ ജെബി മേത്തർ. പാർട്ടിയുടെ വളരെ മുതിർന്ന നേതാവായ അദ്ദേഹം തന്റെ അനുഭവങ്ങളാണ് തുറന്നുപറഞ്ഞത്. മുന്നണിയിലെ തീരുമാനങ്ങൾ മാധ്യമങ്ങളിലൂടെയല്ല അറിയേണ്ടതെന്ന അദ്ദേഹത്തിന്റെ നിലപാട് തികച്ചും ന്യായമാണെന്നും, അത് പറയാനുള്ള പൂർണ്ണ അവകാശം അദ്ദേഹത്തിനുണ്ടെന്നും ജെബി മേത്തർ വ്യക്തമാക്കി.

കെ.പി.സി.സി എക്സിക്യൂട്ടീവ് യോഗം അടിയന്തരമായി വിളിച്ചുചേർക്കണമെന്ന് ആവശ്യപ്പെട്ട് മഹിളാ കോൺഗ്രസ് കെ.പി.സി.സി അധ്യക്ഷൻ സണ്ണി ജോസഫിന് കത്ത് നൽകി. കഴിഞ്ഞ മൂന്ന് മാസമായി നേരിട്ടും ഫോണിലൂടെയും ഇ-മെയിൽ വഴിയുമെല്ലാം ഈ ആവശ്യം നേതൃത്വത്തോട് ഉന്നയിക്കുന്നുണ്ട്. ഉൾപ്പാർട്ടി ജനാധിപത്യത്തിൽ വിശ്വസിക്കുന്ന അച്ചടക്കമുള്ള പ്രവർത്തകയെന്ന നിലയിൽ, പറയാനുള്ള കാര്യങ്ങൾ പാർട്ടി വേദികളിൽ തന്നെയാണ് ഉന്നയിക്കാറുള്ളതെന്നും ജെബി മേത്തർ പറഞ്ഞു.

ഇതിനുപുറമെ, സുപ്രധാന ബോർഡ്-കോർപ്പറേഷൻ പദവികളിലേക്ക് യാതൊരു താല്പര്യവുമില്ലാത്ത ആളുകളെ പരിഗണിക്കുന്നതിൽ മഹിളാ കോൺഗ്രസിന് കടുത്ത പരാതിയുണ്ടെന്നും അവർ കൂട്ടിച്ചേർത്തു. പാർട്ടിക്കുള്ളിലെ പുതിയ വിവാദങ്ങളുടെ പശ്ചാത്തലത്തിൽ മഹിളാ കോൺഗ്രസിന്റെ ഈ നിലപാട് നേതൃത്വത്തിന് കൂടുതൽ തലവേദന സൃഷ്ടിക്കും.