അഹിംസയെന്ന ആയുധത്തിലൂടെ സാമ്രാജ്യത്വ ശക്തികളെ മുട്ടുകുത്തിച്ച രാഷ്ട്രപിതാവ് മഹാത്മാഗാന്ധിയുടെ 157-ാം ജന്മവാർഷിക ദിനമാണിന്ന്. ഗാന്ധിജിയോടുള്ള ആദരസൂചകമായി ഈ ദിനം ഐക്യരാഷ്ട്രസഭ അന്താരാഷ്ട്ര അഹിംസാ ദിനമായാണ് ആചരിക്കുന്നത്. ‘എന്റെ ജീവിതമാണ് എന്റെ സന്ദേശം’ എന്ന് ലോകത്തോട് വിളിച്ചുപറഞ്ഞ മോഹൻദാസ് കരംചന്ദ് ഗാന്ധി, സത്യവും അഹിംസയും സമാധാനവും എക്കാലത്തെയും വലിയ പോരാട്ട മാർഗ്ഗങ്ങളാണെന്ന് തന്റെ ജീവിതത്തിലൂടെ തെളിയിച്ചു.
ലണ്ടനിലെ നിയമപഠനത്തിന് ശേഷം ദക്ഷിണാഫ്രിക്കയിലെത്തിയ ഗാന്ധിജി അവിടെ വെച്ചാണ് വംശീയ വിവേചനത്തിനെതിരായ സത്യാഗ്രഹ സമരങ്ങൾക്ക് തുടക്കം കുറിച്ചത്. 1915-ൽ ഇന്ത്യയിൽ മടങ്ങിയെത്തിയ അദ്ദേഹം രാജ്യത്തിന്റെ സ്വാതന്ത്ര്യ സമര പോരാട്ടങ്ങൾക്ക് പുതിയ മുഖം നൽകി. ചമ്പാരൻ സത്യാഗ്രഹം, നിസ്സഹകരണ പ്രസ്ഥാനം, ഉപ്പുസത്യാഗ്രഹം, ക്വിറ്റ് ഇന്ത്യാ സമരം തുടങ്ങി ഒരു തുള്ളി രക്തം പോലും ചിന്താതെയുള്ള അദ്ദേഹത്തിന്റെ സമരമുറകൾ ലോകചരിത്രത്തിലെ തന്നെ സുപ്രധാന നാഴികക്കല്ലുകളാണ്.
സ്വാതന്ത്ര്യ പോരാട്ടത്തിന് പുറമെ, ഇന്ത്യൻ സമൂഹത്തിൽ നിലനിന്നിരുന്ന അനാചാരങ്ങൾക്കും വിവേചനങ്ങൾക്കും എതിരെ അദ്ദേഹം ശക്തമായി നിലകൊണ്ടു. രാജ്യവിഭജനകാലത്ത് മുറിവുണക്കാനും മതസൗഹാർദ്ദം ഊട്ടിയുറപ്പിക്കാനും സമാധാന സന്ദേശവുമായി അദ്ദേഹം രാജ്യമെമ്പാടും സഞ്ചരിച്ചു. നെൽസൺ മണ്ടേല, മാർട്ടിൻ ലൂഥർ കിംഗ് ജൂനിയർ തുടങ്ങിയ ലോകനേതാക്കളെപ്പോലും സ്വാധീനിച്ച ഗാന്ധിയൻ ദർശനങ്ങൾക്ക് സംഘർഷങ്ങൾ നിറഞ്ഞ സമകാലിക ലോകത്ത് പ്രസക്തിയേറുകയാണ്.
+ There are no comments
Add yours