തിരുവനന്തപുരം: മന്ത്രി കെ.എം. ഷാജിയുടെ വാഹനം തടഞ്ഞുനിർത്തി പ്രതിഷേധിച്ച സംഭവത്തിൽ ബിജെപി പ്രവർത്തകനായ രഞ്ജിത്തിനെ കന്റോൺമെന്റ് പൊലീസ് അറസ്റ്റ് ചെയ്തു. കണ്ടാലറിയാവുന്ന യുവമോർച്ച പ്രവർത്തകർക്കെതിരെ ജാമ്യമില്ലാ വകുപ്പുകൾ ചുമത്തി പൊലീസ് സ്വമേധയാ കേസെടുക്കുകയായിരുന്നു. സംഭവത്തിൽ കേസെടുക്കേണ്ടതില്ലെന്ന് മന്ത്രി നിർദ്ദേശിച്ചിരുന്നെങ്കിലും ഇത് പരിഗണിക്കാതെയാണ് പൊലീസിന്റെ നടപടി. അറസ്റ്റിലായ രഞ്ജിത്തിനെ കൂടാതെ മറ്റ് മൂന്നുപേരെക്കൂടി കേസിൽ പ്രതിചേർത്തിട്ടുണ്ട്.
ബുധനാഴ്ച രാത്രി എട്ട് മണിയോടെ സെക്രട്ടേറിയറ്റിന് സമീപമുള്ള വാൻറോസ് ജംഗ്ഷനിലായിരുന്നു നാടകീയ സംഭവങ്ങൾ അരങ്ങേറിയത്. പൈലറ്റോ എസ്കോർട്ടോ ഇല്ലാതെ ഔദ്യോഗിക വാഹനത്തിൽ സഞ്ചരിക്കുകയായിരുന്ന മന്ത്രിയെ യുവമോർച്ച പ്രവർത്തകർ റോഡിൽ തടയുകയായിരുന്നു. ഇതോടെ വാഹനത്തിൽ നിന്നിറങ്ങിയ മന്ത്രി ഒരു ഓട്ടോറിക്ഷയിൽ കയറി പോകാൻ ശ്രമിച്ചെങ്കിലും പ്രതിഷേധക്കാർ അതും തടഞ്ഞു. അരമണിക്കൂറോളം വഴിയിൽ കുടുങ്ങിയ മന്ത്രി കെ.എം. ഷാജി ഒടുവിൽ അവിടെനിന്നും നടന്നുപോകുകയായിരുന്നു.
കൊല്ലത്ത് വെച്ച് കേന്ദ്ര ആഭ്യന്തരമന്ത്രി അമിത് ഷായ്ക്ക് നേരെ യൂത്ത് കോൺഗ്രസ് പ്രവർത്തകർ കരിങ്കൊടി കാണിച്ച സംഭവത്തിന് പിന്നാലെയാണ് സംസ്ഥാനത്തെ യു.ഡി.എഫ് മന്ത്രിമാർക്കെതിരെ ബി.ജെ.പിയും യുവമോർച്ചയും പ്രതിഷേധം ശക്തമാക്കിയത്. ഇതിന്റെ തുടർച്ചയായാണ് മന്ത്രി കെ.എം. ഷാജിക്കെതിരെയും കരിങ്കൊടി പ്രതിഷേധമുണ്ടായത്.
+ There are no comments
Add yours