പൊന്നണിഞ്ഞ് ഇന്ത്യ: ഏഷ്യൻ ഗെയിംസിൽ അമ്പെയ്ത്തിലും ഷൂട്ടിംഗിലുമായി നാല് സ്വർണ്ണം കൂടി

ഏഷ്യൻ ഗെയിംസിൽ ഇന്ത്യയ്ക്ക് നാല് സ്വർണ്ണം കൂടി. അമ്പെയ്ത്തിൽ പുരുഷ – വനിതാ ടീമുകളും മിക്സഡ് ടീമും സ്വർണ്ണം നേടിയപ്പോൾ, ഷൂട്ടിംഗ് മിക്സഡ് ട്രാപ്പ് വിഭാഗത്തിലും ഇന്ത്യ സുവർണ്ണ നേട്ടം സ്വന്തമാക്കി.

അമ്പെയ്ത്തിൽ മൂന്ന് വിഭാഗങ്ങളിലാണ് ഇന്ത്യൻ താരങ്ങൾ സ്വർണ്ണത്തിലേക്ക് അമ്പെയ്തത്. കോമ്പൗണ്ട് വനിതാ ടീം വിഭാഗത്തിൽ ജ്യോതി, പ്രിതിക, ചികിത സഖ്യം ഫൈനലിൽ ചൈനയെ തകർത്താണ് (സ്കോർ: 238-234) സ്വർണ്ണം നേടിയത്. മിക്സഡ് ടീം വിഭാഗത്തിൽ ചികിത – സാഹിൽ ജോഡി ഷൂട്ടോഫിൽ ദക്ഷിണ കൊറിയയെ പരാജയപ്പെടുത്തി സ്വർണ്ണം കരസ്ഥമാക്കി. ഈ സുവർണ്ണ നേട്ടത്തോടെ ഇവർ 2028-ലെ ലോസ് ഏഞ്ചൽസ് ഒളിമ്പിക്സിനും യോഗ്യത നേടി. പുരുഷ ടീമിനത്തിൽ കരുത്തരായ ചൈനയെ ഒറ്റപ്പോയിന്റിന് മറികടന്നാണ് ഇന്ത്യയുടെ സ്വർണ്ണ നേട്ടം. സാഹിൽ, കുശാൽ, ഗണേഷ് എന്നിവർ ഉൾപ്പെട്ടതാണ് പുരുഷ ടീം.

ബോക്സിംഗിൽ വനിതകളുടെ 75 കിലോ വിഭാഗത്തിൽ ഒളിമ്പിക്സ് വെങ്കല മെഡൽ ജേതാവായ ലവ്‌ലിന ബോർഗോഹെയ്ൻ ഫൈനലിലേക്ക് മുന്നേറി. ഏഷ്യൻ ഗെയിംസിൽ തുടർച്ചയായി ബോക്സിംഗ് ഫൈനലിലെത്തുന്ന ആദ്യ ഇന്ത്യൻ വനിതയെന്ന ചരിത്രനേട്ടവും ഇതോടെ ലവ്‌ലിന സ്വന്തമാക്കി. അതേസമയം, സെമിയിൽ ചൈനീസ് താരത്തോട് പരാജയപ്പെട്ട പ്രിയ ഗംഗാസിന്റെ പോരാട്ടം വെങ്കലത്തിൽ ഒതുങ്ങി. പുരുഷന്മാരുടെ 90 കിലോ വിഭാഗത്തിൽ കപിൽ പോഖ്‌റിയയും ഇന്ത്യയ്ക്കായി വെങ്കലം നേടി. ഇതിനുപുറമെ, സ്ക്വാഷിൽ പുരുഷ – വനിതാ ടീമുകൾ സെമിയിലേക്ക് മുന്നേറി മെഡൽ ഉറപ്പിച്ചിട്ടുണ്ട്.