ന്യൂഡൽഹി: തീവ്ര വോട്ടർപട്ടിക പരിഷ്കരണത്തിന്റെ (എസ്.ഐ.ആർ) ഭാഗമായുള്ള ഫോം സിക്സിലെ വിവാദ അനുബന്ധ ചോദ്യങ്ങൾ കേന്ദ്ര തിരഞ്ഞെടുപ്പ് കമ്മീഷൻ നീക്കം ചെയ്തു. ECINet പോർട്ടലിൽ നിന്നാണ് ഈ ചോദ്യങ്ങൾ ഒഴിവാക്കിയത്. അപേക്ഷകന്റെ മാതാപിതാക്കളുടെയോ മുത്തശ്ശി-മുത്തച്ഛന്മാരുടെയോ മുൻ എസ്.ഐ.ആർ വിവരങ്ങൾ തേടുന്നതായിരുന്നു ഫോമിലെ ചോദ്യങ്ങൾ. ഇത് വലിയ ചർച്ചകൾക്കും വിവാദങ്ങൾക്കും വഴിവെച്ചിരുന്നു. വിഷയത്തിൽ മറ്റ് രണ്ട് കമ്മീഷണർമാർ മുഖ്യ തിരഞ്ഞെടുപ്പ് കമ്മീഷണർ ഗ്യാനേഷ് കുമാറിനോട് വിയോജിപ്പ് അറിയിച്ചതിന് പിന്നാലെയാണ് ഈ നടപടി.
എസ്.ഐ.ആർ നടപടികൾ പൂർത്തിയായ സംസ്ഥാനങ്ങളിലെ ഓൺലൈൻ പോർട്ടലുകളിൽ നിന്നാണ് നിലവിൽ ചോദ്യങ്ങൾ നീക്കം ചെയ്തിട്ടുള്ളത്. എന്നാൽ, നടപടികൾ പുരോഗമിക്കുന്ന സംസ്ഥാനങ്ങളിൽ പഴയ സ്ഥിതി തന്നെ തുടരും. ചോദ്യങ്ങൾ ഒഴിവാക്കാനുള്ള കമ്മീഷന്റെ തീരുമാനത്തിന് നാല് ദിവസത്തിന് ശേഷമാണ് ഇത് സംബന്ധിച്ച നടപടികൾ നടപ്പിലായത്.
അതിനിടെ, ഡൽഹിയിലെ വോട്ടർ പട്ടിക പുതുക്കലിൽ ഗുരുതരമായ വീഴ്ചകൾ സംഭവിച്ചതായി റിപ്പോർട്ടുകൾ പുറത്തുവന്നു. പ്രതിദിനം ഒഴിവാക്കാവുന്ന വോട്ടർമാരുടെ അപേക്ഷകൾക്ക് പത്ത് എന്ന പരിധി നിശ്ചയിച്ചിരുന്നെങ്കിലും, ബൂത്ത് ലെവൽ ഏജന്റുമാർ (ബി.എൽ.എ) ഇത് വ്യാപകമായി മറികടന്നതായി കണ്ടെത്തി. ഒരു ബി.ജെ.പി ബി.എൽ.എ രണ്ട് ദിവസങ്ങളിലായി 35 അപേക്ഷകളാണ് സമർപ്പിച്ചത്. കൂടാതെ, ഒരു ഇരുപതുകാരൻ സ്വന്തം പേര് ഒഴിവാക്കുന്നതിനായി മരണകാരണം ചൂണ്ടിക്കാട്ടി അപേക്ഷ സമർപ്പിച്ചതായും വിവരമുണ്ട്. പുതിയ വോട്ടർമാരെ പട്ടികയിൽ ചേർക്കുന്നതിനേക്കാൾ വേഗത്തിലാണ് പേര് ഒഴിവാക്കാനുള്ള അപേക്ഷകളിൽ നടപടിയെടുക്കുന്നതെന്നും വ്യാപക ആക്ഷേപമുയർന്നിട്ടുണ്ട്.
+ There are no comments
Add yours