തിരുവനന്തപുരം: കോവളത്തെ അനധികൃത സ്പാ കേന്ദ്രവുമായി ബന്ധപ്പെട്ട പീഡനക്കേസിൽ അറസ്റ്റിലായ നഗരസഭാ ഹെൽത്ത് ഇൻസ്പെക്ടർ അനുരൂപിന്റെ പെൺസുഹൃത്തിലേക്കും അന്വേഷണം വ്യാപിപ്പിക്കുന്നു. പീഡനത്തിനിരയായ 16-കാരിയുമായി ഇവർ ഫോണിലൂടെ ബന്ധപ്പെട്ടിരുന്നുവെന്ന വിവരത്തിന്റെ അടിസ്ഥാനത്തിൽ ഫോൺ രേഖകൾ ഉൾപ്പെടെ വിശദമായി പരിശോധിക്കാൻ പ്രത്യേക അന്വേഷണ സംഘം (എസ്.ഐ.ടി) തീരുമാനിച്ചു. തമിഴ്‌നാട്ടിലെ ഗുഡുവഞ്ചേരിയിലുള്ള സ്പായിലും താൻ പീഡനത്തിനിരയായെന്ന പെൺകുട്ടിയുടെ വെളിപ്പെടുത്തലിന് പിന്നാലെ, തമിഴ്നാട് പോലീസും കുട്ടിയുടെ മൊഴി രേഖപ്പെടുത്തും. കേസിന്റെ തുടർ അന്വേഷണ ചുമതല തിരുവനന്തപുരം കൺട്രോൾ റൂം എ.സി.പിക്ക് കൈമാറിയിട്ടുണ്ട്.
കഴിഞ്ഞ ജൂലൈ മാസത്തിലാണ് പ്രായപൂർത്തിയാകാത്ത പെൺകുട്ടിയെ പ്രതികൾ കോവളത്ത് എത്തിച്ചത്. ഈ സാഹചര്യത്തിൽ പോലീസ് മനുഷ്യക്കടത്തിനും കേസെടുത്തിട്ടുണ്ട്. ഹെൽത്ത് ഇൻസ്പെക്ടർ പദവിയിലൂടെ ലഭിച്ച സ്വാധീനം ഉപയോഗിച്ചാണ് അനുരൂപ് ഇത്തരം ബിസിനസ്സുകളിലേക്ക് കടന്നത്. കേസിൽ ഉൾപ്പെട്ട ‘ഡ്രീം സ്പാ’ തുടങ്ങാൻ നിഷാന്തിനെ പ്രേരിപ്പിച്ചതും പുറത്തുനിന്ന് പെൺകുട്ടികളെ ഇവിടേക്ക് എത്തിച്ചുനൽകിയതും അനുരൂപാണെന്ന് പോലീസ് കണ്ടെത്തിയിരുന്നു. ഇതിന് പുറമെ, അനുരൂപിന്റെ ബാങ്ക് അക്കൗണ്ടിലേക്ക് ഗൂഗിൾ പേ വഴി കഴിഞ്ഞ മൂന്ന് മാസത്തോളമായി പ്രതിദിനം പതിനായിരത്തിലധികം രൂപ എത്തിയിരുന്നതായും, സ്പാകളുടെ മറവിൽ വൻ സാമ്പത്തിക ഇടപാടുകൾ നടന്നതായും അന്വേഷണത്തിൽ വ്യക്തമായിട്ടുണ്ട്. പ്രതിയെ കുരുക്കാൻ ഈ ഡിജിറ്റൽ പണമിടപാടുകൾ അന്വേഷണ സംഘത്തിന് നിർണ്ണായകമായി.
+ There are no comments
Add yours