മുംബൈ: ബോളിവുഡ് നടൻ ടൈഗർ ഷ്റോഫിന് നേരെയുണ്ടായ വധശ്രമത്തിൽ മൂന്ന് പ്രതികളെയും പോലീസ് പിടികൂടി. രാജസ്ഥാനിലെ കോട്ടയിൽ വെച്ച് മുംബൈ പോലീസും രാജസ്ഥാൻ പോലീസും സംയുക്തമായി നടത്തിയ നീക്കത്തിലാണ് ഇവർ വലയിലായത്. റിതിക് കുമാർ എന്ന റോഷൻ (22), റെഹാൻ അൻസാരി (18), 17 വയസ്സുകാരനായ ഫൂൽ സിംഗ് എന്നിവരാണ് പിടിയിലായത്. ആക്രമണത്തിന് ശേഷം പുണെ-ജയ്‌പൂർ സൂപ്പർ ഫാസ്റ്റ് (12939) ട്രെയിനിലാണ് പ്രതികൾ രാജസ്ഥാനിലേക്ക് കടന്നത്.
കഴിഞ്ഞ ദിവസമാണ് കാറിൽ സഞ്ചരിക്കുകയായിരുന്ന താരത്തിന് നേരെ അക്രമികൾ അഞ്ച് റൗണ്ട് വെടിയുതിർത്തത്. വെടിവെപ്പിനിടെ കാറിന്റെ ചില്ല് തറച്ചുകയറി ടൈഗർ ഷ്റോഫിന് പരിക്കേറ്റിരുന്നു. നെഞ്ചിലും തോളിലും വലതുകൈയിലും ബാൻഡേജുകളിട്ട് അദ്ദേഹം വീട്ടിലിരിക്കുന്നതിന്റെ ചിത്രങ്ങൾ പുറത്തുവന്നിട്ടുണ്ട്. ആക്രമണത്തിൽ നടന്റെ ഡ്രൈവർക്കും പരിക്കേറ്റിരുന്നു. തലനാരിഴയ്ക്കാണ് ടൈഗർ വൻ ദുരന്തത്തിൽ നിന്നും രക്ഷപ്പെട്ടത്.
സംഭവത്തിന് പിന്നാലെ മഹാരാഷ്ട്ര ഉപമുഖ്യമന്ത്രി ഏക്നാഥ് ഷിൻഡെ ടൈഗർ ഷ്റോഫിനെ വസതിയിലെത്തി സന്ദർശിച്ചു. നഗരത്തിന്റെ സമാധാനം തകർക്കാൻ ആരെയും അനുവദിക്കില്ലെന്നും മുംബൈയിൽ ഗുണ്ടാസംഘങ്ങളുടെ വിളയാട്ടം വെച്ചുപൊറുപ്പിക്കില്ലെന്നും അദ്ദേഹം വ്യക്തമാക്കി. കുറ്റക്കാർക്കെതിരെ ശക്തമായ നിയമനടപടി സ്വീകരിക്കുമെന്നും ഷിൻഡെ ഉറപ്പുനൽകി.
+ There are no comments
Add yours