തിരുവനന്തപുരം: സംസ്ഥാനത്തെ സർക്കാർ ആശുപത്രികളിൽ അനുഭവപ്പെടുന്ന മരുന്ന് ക്ഷാമത്തിന് ഉടനടി പരിഹാരമാകാൻ സാധ്യതയില്ല. ഈ മാസം അവസാനത്തോടെ മാത്രമേ മരുന്നുകൾ പൂർണ്ണമായി ആശുപത്രികളിൽ എത്തിക്കാൻ കഴിയൂ എന്നാണ് വിലയിരുത്തൽ. കഴിഞ്ഞ നാല് വർഷമായി കേരള മെഡിക്കൽ സർവീസസ് കോർപ്പറേഷന് (കെ.എം.എസ്.സി.എൽ) ആരോഗ്യവകുപ്പ് നൽകാനുള്ള 900 കോടിയോളം രൂപയുടെ കുടിശ്ശികയാണ് നിലവിലെ പ്രതിസന്ധിയുടെ പ്രധാന കാരണം.
തുക കുടിശ്ശികയായതിനാൽ മരുന്ന് നിർമ്മാതാക്കൾ സഹകരിക്കാൻ തയ്യാറാകുന്നില്ല. ഇക്കഴിഞ്ഞ ഏപ്രിൽ, മെയ് മാസങ്ങളിൽ വിളിച്ച ടെൻഡറുകളിൽ 167 ഓളം മരുന്നുകൾ വിതരണം ചെയ്യാൻ ആളില്ലാത്തത് ആരോഗ്യവകുപ്പിന് വലിയ തിരിച്ചടിയായിരിക്കുകയാണ്. ഇതിനുപുറമെ ജനറിക് മരുന്നുകളുടെയും അസംസ്കൃത വസ്തുക്കളുടെയും ലഭ്യതക്കുറവും പ്രശ്നം രൂക്ഷമാക്കുന്നു.
മുൻ സർക്കാർ വരുത്തിവെച്ച കോടിക്കണക്കിന് രൂപയുടെ സാമ്പത്തിക ബാധ്യതയാണ് ഇപ്പോഴത്തെ പ്രതിസന്ധിക്ക് കാരണമെന്ന് ആരോഗ്യമന്ത്രി കെ. മുരളീധരൻ നേരത്തെ വ്യക്തമാക്കിയിരുന്നു. എന്നാൽ, വിഷയം പരിഹരിക്കുന്നതിൽ ആരോഗ്യവകുപ്പ് പൂർണ്ണമായും പരാജയപ്പെട്ടുവെന്നാണ് പ്രതിപക്ഷത്തിന്റെ ആരോപണം. ഇതിനെല്ലാം പുറമെ, ഇത്രയും വലിയൊരു പ്രതിസന്ധി ഘട്ടത്തിലും ആരോഗ്യവകുപ്പ് സെക്രട്ടറിയും മന്ത്രിയും തമ്മിലുള്ള അഭിപ്രായവ്യത്യാസങ്ങൾ തുടരുന്നത് പ്രശ്നപരിഹാരത്തെ കൂടുതൽ സങ്കീർണ്ണമാക്കുകയാണ്.
+ There are no comments
Add yours