തൃശൂർ നഗരത്തില് വാഹനങ്ങള് തടഞ്ഞ് മദ്യലഹരിയില് ബഹളമുണ്ടാക്കിയ യുവതി അറസ്റ്റില്. തൃശൂർ സ്വദേശിനി റഹ്മത് (21) ആണ് പൊലീസിൻ്റെ പിടിയിലായത്. 2026 സെപ്റ്റംബർ 9 ബുധനാഴ്ച അർധരാത്രിയോടെയാണ് സംഭവം നടന്നത്. അമിതമായി മദ്യപിച്ച യുവതി നടുറോഡില് വാഹനങ്ങള് തടയുകയും പണം ആവശ്യപ്പെടുകയുമായിരുന്നുവെന്നാണ് പരാതി. സംഭവമറിഞ്ഞ് സ്ഥലത്തെത്തിയ പൊലീസ് ഉദ്യോഗസ്ഥരെയും യുവതി ആക്രമിച്ചു.
ആണ്സുഹൃത്ത് മുങ്ങി, പൊലീസിന് മർദനം
സംഭവ സമയത്ത് യുവതിയുടെ ആണ് സുഹൃത്തും ഒപ്പമുണ്ടായിരുന്നുവെന്ന് പൊലീസ് പറഞ്ഞു. പൊലീസെത്തിയെന്ന് കണ്ടതോടെ യുവതിയെ ഉപേക്ഷിച്ച് ഇയാള് കടന്നുകളഞ്ഞുവെന്നാണ് വിവരം. നടുറോഡില് യുവതി വാഹനങ്ങള് തടഞ്ഞു പണം വാങ്ങുന്നതായി തൃശൂർ പൊലീസിന് ആദ്യം വിവരം ലഭിച്ചത് തിരുവനന്തപുരത്തെ പൊലീസ് കണ്ട്രോള് റൂമില്നിന്നാണ്. തുടർന്ന് സ്ഥലത്തെത്തിയ വനിതാ പൊലീസുകാരടങ്ങുന്ന സംഘം യുവതിയെ സ്റ്റേഷനില് എത്തിച്ചു. എന്നാല് ഇവിടെനിന്ന് ഇറങ്ങിയോടിയ റഹ്മത്, തന്നെ പിടിക്കാനായി പിറകേ വന്ന പൊലീസുകാരെയും മർദിച്ചു.
എസ്ഐക്ക് കടിയേറ്റു
പിന്നീട് വൈദ്യപരിശോധനയ്ക്കിടെയും യുവതി തൻ്റെ അതിക്രമം തുടർന്നു. വൈദ്യപരിശോധനയ്ക്കിടെ എസ്ഐയെ മർദിച്ച യുവതി കടിച്ച് പരിക്കേല്പ്പിക്കുകയും ചെയ്തു. ജോലി തേടി തൃശൂർ നഗരത്തിലേക്ക് എത്തിയതാണെന്നും പ്ലസ്ടു വരെയാണ് പഠിച്ചിട്ടുള്ളതെന്നും യുവതി പൊലീസിനോട് വ്യക്തമാക്കിയിട്ടുണ്ട്.
ഔദ്യോഗിക കൃത്യനിർവഹണം തടസ്സപ്പെടുത്തിയതിനും നടുറോഡില് ബഹളമുണ്ടാക്കിയതിനുമാണ് നിലവില് കേസ് എടുത്തിട്ടുള്ളത്. തൃശൂർ ഈസ്റ്റ് പൊലീസാണ് കേസ് രജിസ്റ്റർ ചെയ്തത്. സംഭവത്തില് കൂടുതല് അന്വേഷണം പുരോഗമിക്കുകയാണ്.
+ There are no comments
Add yours