കോഴിക്കോട്: കര്ണാടകയിലെ ഷിരൂരിൽ മണ്ണിടിച്ചിൽ കാണാതായ കോഴിക്കോട് സ്വദേശിയായ അർജുനെ കണ്ടെത്താനുളള തിരച്ചില് പുനരാരംഭിക്കുന്നതില് അനിശ്ചിതത്വം തുടരുന്നു. മുഖ്യമന്ത്രി ഉള്പ്പെടെയുളളവര് സമ്മര്ദ്ദം ചെലുത്തിയെങ്കിലും കാലാവസ്ഥ അനുകൂലമല്ലെന്ന നിലപാടിലാണ് കര്ണാടക. അതേസമയം, തെരച്ചില് പൂര്ണമായും അവസാനിപ്പിച്ചിട്ടില്ലെന്ന് കര്ണാടക സര്ക്കാര് ഹൈക്കോടതിയെ അറിയിച്ചു.
ഗംഗാവലി പുഴയിലെ തെരച്ചില് കര്ണാടക സര്ക്കാര് ഔദ്യോഗികമായി അവസാനിപ്പിച്ചിട്ട് ഒരാഴ്ച കഴിഞ്ഞു. ഇനിയെന്ന് പുനരാരംഭിക്കുമെന്ന ആര്ക്കും അറിയില്ല.
കര്ണാടക അധികൃതരും ഇക്കാര്യത്തില് യാതൊന്നും പറയുന്നില്ല. തെരച്ചില് അടിയന്തരമായി പുനരാരംഭിക്കണമെന്ന് ആവശ്യപ്പെട്ട് പിണറായി വിജയൻ വീണ്ടും കർനാടക മുഖ്യമന്ത്രി സിദ്ധരാമയ്യയ്ക്ക് കത്ത് അയച്ചെങ്കിലും അനുകൂല നടപടികളൊന്നും ഉണ്ടായിട്ടില്ല. ഗംഗാവലി പുഴയില് അടിയൊഴുക്ക് ശക്തമാണ്, കാലാവസ്ഥ പ്രതികൂലമാണ് എന്നിങ്ങനെയുള്ള വാദങ്ങള് പറഞ്ഞാണ് തെരച്ചില് പുനരാരംഭിക്കുന്നതില് നിന്ന് കര്ണാടക ഒഴിഞ്ഞുമാറുന്നത്.
അതേസമയം, സഹായം അഭ്യര്ത്ഥിച്ച് ഉത്തര കന്നഡ ജില്ലയിലെ സര്ക്കാര് ഓഫീസുകള് കയറിയിറങ്ങുകയാണ് അര്ജുന്റെ സഹോദരി ഭര്ത്താവ് ജിതിന്. ഷിരൂരില് എത്തിയെങ്കിലും പൊലീസ് തിരികെ അയച്ചു.
കർണാടകയിലെ ഷിരൂർ ദേശീയപാതയിലുണ്ടായ മണ്ണിടിച്ചിലിൽ കാണാതായ മലയാളി ഡ്രൈവർ അർജുനായുള്ള തിരച്ചിൽ തുടരണമെന്ന് കർണാടക ഹൈക്കോടതി സംസ്ഥാന സർക്കാരിനോട് നിർദേശിച്ചു. റെഡ് അലർട്ട് കാരണമാണ് ദൗത്യം 5 ദിവസം നിർത്തി വെച്ചതെന്നാണ് സർക്കാർ ഹൈക്കോടതിയെ അറിയിച്ചിരിക്കുന്നത്. ഹർജി അടുത്ത തിങ്കളാഴ്ച വീണ്ടും പരിഗണിക്കും. അതേസമയം അർജുനെ കണ്ടെത്താൻ ശ്രമിക്കണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയൻ കഴിഞ്ഞ ദിവസം കർണാടക മുഖ്യമന്ത്രി സിദ്ധരാമയ്യക്ക് കത്തയച്ചിരുന്നു.
+ There are no comments
Add yours